ئامادەکردنی/ محەمەد رەزا
رۆژنامەی کوردستانی نوێ، لە پەرۆشیی بۆ گەیاندنی کێشە و گرفتەکانی هاووڵاتیان بۆ بەرچاوی لێپرسراوان لاپەڕەیەکی تایبەتی تەرخانکردووە، کێشەی کەمیی خزمەتگوزاری کۆڵان، گەڕەک، شەقام، گوند، قەزا، ناحیە و شارەکانی هەرێمی تێدا بڵاودەکاتەوە، بە ئامانجی راستەوخۆ گەیاندنی بۆ بەرچاوی لێپرسراوان و چارەسەرکردنی.
قوتابخانەی کانی گۆمە مەترسی رووخانی لەسەرە
ئەوەی لە وێنەكەدا دیارە قوتابخانەی كانی گۆمەیە لە شاری سلێمانی، زیاتر لە 1600 خوێندکار تیایدا دەخوێنێت و سێ دەوامی تێدا دەكرێت، دیواری دەرەوە و ناوەوەی قوتابخانەکە درزی گەورەی تێدا دروست بووە و مەترسی رووخانی لەسەرە، داوا لە لایەنی پەیوەندیدار دەکەین بە زوویی چاکی بکات بۆئەوەی کارەساتێک نەقەومێت.
قوتابخانەی کانی گۆمە لە شاری سلێمانی
دانیشتوانی شێخان رەزامەندییان لە شارەوانی دەوێت
بەشێک لە دانیشتوانی گەڕەکی شێخان لە شاری سلێمانی، داوای رەزامەندی لە شارەوانی دەکەن، بۆ ئەوەی زەوییەکی چۆڵ لە گەڕەکەکەیاندا هەیە بیکەن بە مزگەوت.
دانیشتوویەکی گەڕەکی شێخان بۆ کوردستانی نوێ وتی: ماوەی چەند ساڵێکە ئەو زەوییە چۆڵە بووەتە شوێنی کۆبوونەوەی خۆڵ و خاشاک، لە هاویندا بۆنێکی ناخۆشی هەیە و بووەتە سەرچاوەی بڵاوبوونەوەی نەخۆشی بۆمان، داوا دەکەین شارەوانی رەزامەندبێت لەسەر ئەرکی خێرخوازان مزگەوتێکی لەسەر دروست بکەین و لە کۆبوونەوەی خۆڵ و خاشاکیش نەجاتمان دەبێت.
زەوییەکی چۆڵ لە گەڕەکی شێخان لە شاری سلێمانی
داواکاریی گوندنشینانی حاجیاوای باخ
گوندی حاجیاوای باخ سەر بە ناحیەی پیرەمەگرون و قەزای دوكانە، ژمارەی دانیشتوانەكەی 280 كەسن.
كاوە ئەحمەد دانیشتووی گوندی حاجیاوای باخ بۆ کوردستانی نوێ وتی: شەقامی سەرەكی گوندەكەمان قیرەکەی تێکچووە و پێویستی بە چاککردنە، داوادەکەین کۆڵانەکانی گوندەکەمان بۆ قیرتاو بکرێت.
وتیشی: قوتابی سێ گوندی دیکە لە هەمان قوتابخانەی گوندەکەمان دەخوێنن، تا پۆلی شەشی بنەڕەتی تێدایە و داوا دەکەین قوتابخانەکەمان گەورە بکرێت و لایەنی پەیوەندیدار تا پۆلی 12ی ئامادەیی تێدا بکاتەوە.
گوندی حاجیاوای باخ سەر بە ناحیەی پیرەمەگرون
ناڕەزایی گوندنشینانی تەڕەمار
گوندی تەڕەمار بەهۆی كەمیی خزمەتگوزارییەوە تەنیا 20 ماڵی تێدا ماوە.
عومەر سلێمان دانیشتووی گوندی تەڕەمار بۆ كوردستانی نوێ وتی: رێگەی گوندەكەمان لەناو كۆمەڵگەی پیرەمەگرونەوە دەستپێ دەكات، درێژییەكەی دوو كیلۆمەتر و نیوە، رێگەی پێنج گوندی دیکەی لەسەرە و هەمووی چاڵ و چۆڵییە، دەرخستەشی بۆ کراوە بۆئەوەی چاک بکرێت، بەڵام نەکراوە، هەروەها سەرجەم کۆڵانەکانمان گڵە و پێویستی بە قیرتاو کردنە.
وتیشی: چەمێك لە نێوان ماڵەكاندایە پێویستە پردی پەڕینەوەی بۆ دروست بکرێت، جگە لەوە پردێکی دیکە لەسەر رێگەکەمان هەیە کە پێنج گوندی بە یەکەوە بەستۆتەوە، ساڵانە لە وەرزی باران باریندا ئاو دەیبات و پێویستی بە چاککردنە.
ئاماژەی بەوەشکرد، کارەبای گوندەکەمان پێویستی بە چاککردنە لەگەڵ هەڵکەندنی بیرێکی ئیرتیوازی.
گوندنشینانی تەڕەمار خزمەتگوزارییان دەوێت
بەڕێوەبەرایەتی ئاوی سلێمانی تکایە
ئەو گەڕەکەی دەکەوێتە پشت بەنزینخانەی بینایی، رونتر ئەو شەقامەی لە خوار بەنزینخانەکەوە پێچ دەکاتەوە بۆلای فەرمانگەی تاپۆی سلێمانی و لەوبەریشییەوە بەڕێوەبەرایەتی پۆلیسی فریاکەوتنە، لە شەقامەکەوە ئاو دێتە دەرەوە.
شۆفێران و دانیشتوانی ئەو گەڕەکانە بۆ کوردستانی نوێ وتیان: ماوەی مانگێک زیاترە کاتێک ئاوی خواردنەوەی ماڵان بەردەدرێتەوە، ئەو گەڕەکانە نوقمی ئاو دەبێت، داوا لە بەڕێوەبەرایەتیی ئاوی سلێمانی دەکەن بە زوویی چارەسەری بکات.
وتیشیان: حاڵەتەکە بێجگە لەوەی ئاستەنگی بۆ هاتوچۆکردن دروست دەکات، کاریگەریی لەسەر خراپ بوونی قیرەکەش هەبووە.
گەڕەکی پشت بەنزینخانەی بینایی
گوندی سوسێی كۆن بێ خزمەتگوزارییە
گوندی سوسێی كۆن نزیكەی 20 ماڵی تێدایە، گوندنشینان داوای خزمەتگوزاری دەکەن.
جەلال عەبدوڵڵا دانیشتووی گوند بۆ کوردستانی نوێ وتی: رێگەی گوندەكەمان نزیكەی 800 مەتری ماوە قیرتاو بكرێـت، فەرمانی قیرتاوكردنی بۆ دەرچووە و پارەشی بۆ تەرخانكرا، بەڵام بە بیانووی نەمانی پارە قیرتاو نەکرا، دووڕیانێكمان هەیە كە سوسێی كۆن بە شەقامی سەرەكی گوندەكەوە دەبەستێتەوە پێویستیی بە قیرتاوکردنە، لەگەڵ کۆڵانەکان.
وتیشی: گوندەكەمان بنكەی تەندروستیی نییە، پرۆژەی ئاوەکەمان وشکی کردووە و پێویستمان بە هەڵکەندنی بیرێکی ئیرتیوازی و دروستکردنی پرۆژەیەکی نوێی ئاوە لەگەڵ دروستکردنی گۆڕەپانێکی تارتان بۆ یاریکردنی گەنجانی گوند.
ئاماژەی بەوەشکرد، داوا لە وەزارەتی کشتوکاڵ دەکەین هاوکاری جووتیاران بێت.
گوندی سوسێی كۆن نزیكەی 20 ماڵی تێدایە
