سازدانی: نەرمین عوسمان محەمەد
رانیە، ئەو شارەی بە یادەوەرییەکانی عەلی نەبی و هەڵمەتەکانی خەڵکە بە ئەمەکەکەی توانی دەروازەی مێژووی نوێی راپەڕین و وەرچەرخانی گەلەکەمان تۆمار بکات، بەهەمانشێوە ژنانیشی توانیویانە خاوەن رۆڵ و پێگەی خۆیان بن لە خەبات و تێکۆشان و داهێناندا، یەکێک لەو گروپە جوانانەی لە رانیە توانیویەتی رۆڵ و تایبەتمەندیی خۆی هەبێت گروپی «ژنان و کچانی رانیە» یەو
شیرین مام عەلی سەرۆکی گروپەکە سەبارەت بە مێژوو و بیرۆکەی سەرهەڵدانی ئەم گروپە بۆ کوردستانی نوێ وتی: بیرۆکەی دامەزراندنی گروپەکەمان دەگەڕێتەوە بۆئەوەی لەگەڵ کۆمەڵێک هاوڕێمدا باسمان کرد و پاشان لە
رۆژی 1ی مانگی 2ی ساڵی 2017دا بەشێوەیەکی کۆتایی لەسەر دامەزراندنی گروپەکە و شێوازی کارکردن و دروشم و ئامانجە کۆمەڵایەتییەکانی رێکەوتین و لەو سەردەمەدا ئەو گروپە رەنگدانەوەی پێویستییەکانی ژنان و کچانی رانیە بوو، دەتوانم بڵێم هی ژنان و کچانی هەموو کوردستانیش بوو، وەک بزووتنەوەیەکی مێینەیی جیاواز و دوور لە سیاسەت، لەو پێناوەدا یەکەمین گردبوونەوەی ژنان و کچانی لە شاخی گڵە زەردەی نێوان رانیە و دەربەندی رانیە رێکخست و ئامانج و پلانی گروپەکەمان بۆ روونکردنەوە و ئەوانیش بە کۆمەڵ بە دەنگ گروپەکەوە هاتن وئامادەییان دەربڕی بۆ بوون بە ئەندام لە گروپەکەدا.
هاوکات شیرین مام عەلی باسی لە ژمارەی ئەندامانی گروپەکە و تەمەنەکانیان کرد و وتی: ئێستا ئەندامانی گروپەکەمان بە سەدانە و ئەندامێتی لەنێو گروپەکەدا زۆر جیاوازە، چونکە هەموو ژن و کچێکی کودستان دەتوانێت ئەندام بێت تێیدا بەدەر لە جیاوازییەکان لەرووی سیاسیی و حزبایەتی و ئایدیۆلۆژیاوە، بە جیاوازیی تەمەنەکانیشەوە، هەروەها ئێمە گوێ نادەین بە پیشە و بڕوانامە، بۆیە هەموو خانمان دەتوانن ببن بە ئەندام لە گروپەکەماندا بەمەرجێک کار بکەن بۆ یەکێک لە ئامانجەکانی گروپەکەمان، لەوانە پاراستنی بەهاکانی ژنان و کچان و پاراستنی نۆرمە جوانەکانی خێزانی کوردیی، هەروەها پاڵپشتیی ژنان و کچان و بەدەنگەوەهاتنیان بەگوێرەی توانا، بۆ هەموو ئەو ژن و کچانەی پێویستیان بە هاوکاری و دەستگیرۆیی هەمەچەشنەیە، هەروەها بۆمان گرنگە ئەندامان بەشداری لە کاری خێرخوازی گروپدا بکەن.
چالاکییەکانیان
لەبارەی جۆری چالاکییەکانیان شیرین مام عەلی وتی: چالاکییەکانمان لە سەردان و بەسەرکردنەوە کۆمەڵایەتییەکان وەک پرسە و شایی خۆی دەبینێتەوە تا دەگاتە گەشتی بەکۆمەڵ و کاری خێرخوازیی، هەروەها ئێمە لە ڤایبەر و ماسنجەر و وەتسئاپدا گروپی خۆمان هەیە، کە گروپێکی داخراوی ژنان و کچانی ئەندامانی گروپن و تێیاندا کۆڕ و سیمنار و دیالۆگی بەردەواممان هەیە، هەر وەک چۆن گروپەکەمان خاوەنی پەیجی تایبەتی خۆیەتی لە فەیسبووک و ئینستاگرام و سناپچات لە رووی سپۆنسەرکردنیشەوە بە پلەی یەکەم پشت بە هاوکاری ئەندامەکانی خۆمان دەبەستین، بەتایبەت ئەوانەی توانای داراییان باشە و لە وڵاتانی دەرەوە دەژین، هەروەها بۆ کارە خێرخوازییەکانمان بە سوپاسەوە سپۆنسەری بەردەواممان لەسەر ئاستی کوردستان، گروپی کۆمپانیاکانی قەیوانە، چونکە ساڵانە یارمەتی جۆراوجۆری سەدان خێزانی کەمدەرامەتی ئەندام لە گروپەکەماندا دەدەن، هەروەها لەسەر ئاستی دەڤەرەکەش لە کاتی پێویستدا بنەماڵەی کەسایەتی ناسراوی دەڤەرەکەمان کاک حاجی سێناجیانی و کاک حاجی خالید سلێمان دوو نموونەن مایەی پێزانینن، هەروەها سوپاسگوزاری نووسینگەی بەڕێز سەرۆک بافڵ جەلال تاڵەبانی و هەروەها بەڕێز هیوا قەرەنی سەرپەرشتیاری ئیدارەی راپەڕین و دەزگای میدیایی خەندانین، بۆ هاوکارییەکانیان.
دواجار وتی: هیوادارم بزووتنەوەی ژنان و گروپەکەشمان لەپێناو بەدیهێنانی ماف و ئازادییەکانی ژناندا لە جووڵەی نەرم و خەباتی کۆمەڵایەتیی و مەدەنییدا بە رەچاوکردنی نۆرمە جوانەکانی کۆمەڵگەی کوردستانی و بە رێزگرتن لە بەها باڵاکانی خێزانی کوردیی
بەردەوام بێت.
