رووپێویی دوو رەهەندیی تەواو بووە

دەرهێنانی نەوت لە نەفتخانە، لە بەدواداچوونێکی کوردستانی نوێ دا

ئارۆ سامان 

محەمەد یاسین حەسەن، بۆ  کوردستانی نوێ     : رووپێویی بومەلەرزە دوو رەهەندییەكەمان بە سەركەوتوویی تەواو كردووە و لە تەواوكردنی رووپێویی سێ رەهەندیی نزیك دەبینەوە

كۆمپانیای (جوجێت)ی چینی بەرهەمهێنانی نەوت لە كێڵگەی نەفتخانەی سەر بە قەزای خانەقین خێراتر دەكات و لە هەمان كاتدا گەڕانیان لە چەند شوێنێكی تری دەوروبەری نەفتخانە و خانەقین بەردەوامە بە مەبەستی دۆزینەوەی بلۆكی نەوتی دیكە.
محەمەد یاسین حەسەن، بەڕێوەبەری گشتیی كۆمپانیای نەوتی ناوەندیی لە لێدوانێكدا بۆ كوردستانی نوێ رایگەیاند: بەرهەمهێنان لە كێڵگەی نەوتی (نەفتخانە) لە پارێزگای دیالە، لە ماوەی 18 مانگدا دەگاتە خێراییەكی بێوێنە، كە پێشتر بڕیاربوو لە ماوەی پێنج ساڵدا بگاتە ئەو ئاستە.
ئاشكراشیكرد، ئەم پێشكەوتنە ناوازەیە دەگەڕێتەوە بۆ هاوكارییە بەرهەمدارەكانی نێوان كارگێڕیی كۆمپانیاكە لەگەڵ نوێنەرایەتی بەشی كێڵگەكانی دیالە و لیژنە هاوبەشەكانی بەڕێوەبردن و تەكنیكی.
روونیشیكردەوە، كێڵگەی نەفتخانە بە رووبەرێكی فراوانی (2250) كیلۆمەتر چوارگۆشە درێژدەبێتەوە، كە یەكسانە بە %40ی رووبەری بەغدای پایتەخت و ئێستا رووپێویی بومەلەرزە دوو رەهەندییەكەمان بە سەركەوتوویی تەواو كردووە و لە تەواوكردنی رووپێویی سێ رەهەندیی نزیك دەبینەوە.
پرۆژەی خزمەتگوزاری
جەختیكردەوە كۆمپانیای جوجێتی چینی ئێستا كار لەسەر هەنگاوی گەورەتر دەكات، وەك كارەكانی كونكردن، نۆژەنكردنەوەی دامەزراوەكان، و دانانی سەنتەری كارپێكردنی خێرا، جگە لە درێژكردنەوەی بۆری هەناردەكردنی نەوت و غاز بۆ سەرچاوە نزیكەكان.
كۆمپانیای جوجێتی چینی لە بەیاننامەیەكی رەسمیدا ئاشكرایكردووە، نەخشەی پڕۆژەكە زووتر لەو كاتەی بۆی تەرخانكرابوو جێبەجێكراوە و هەنگاوی خێراتریش دەگرینەبەر، ئاماژەی بەوەشكرد، كە گەڕانیان لە چەند شوێنێكی تری دەوروبەری نەفتخانە و خانەقین بەردەوامە بە مەبەستی دۆزینەوەی بلۆكی نەوتی دیكە.
جەواد فەیزوڵڵا قائیمقامی خانەقین بۆ كوردستانی نوێ وتی: كۆمپانیای جوجێتی چینی لە بەرامبەر دەرهێنانی نەوت لە سنوورەكە بە تایبەتی دەوروبەری خانەقین و نەفتخانە، چەند جارێك سەردانیان كردووین و پلانی ئەنجامدانی چەند پڕۆژەیەكمان لەگەڵدا باسكردووین.
وتیشی: داوامانكردووە لەگەڵ پرۆژەكانی خۆیاندا چەند خوێندنگایەكی شارەكە نۆژەنبكەنەوە و بنكەیەكی تەندروستی و پڕۆژەی كارەبامان بۆ ئەنجام بدەن، گفتوگۆكانیشمان لەگەڵیاندا بەردەوامە و هەنگاوی دڵخۆشكەرمان دەبێت بۆ خەڵكی شارەكە.
كێڵگەی نەوتی نەفتخانە یەكێكە لەو كێڵگانەی كە لەگەڵ ئێراندا هاوبەشە، لە ساڵی 1919دا دۆزرایەوە، دەرهێنانی راستەوخۆ لەو ساڵەدا دەستیپێكردووە، كە دەكەوێتە سنووری قەزای خانەقین و لەسەر رێگەی مەندەلییە.