رۆیا سادات: تەنانەت لە تاریکترین بارودۆخدا ژن دەتوانێت جیاوازیی دروستبکات

ئا:نەی نەژاد

رۆیا دووپاتی دەکاتەوە کە خەباتی ژنانی ئەفغانستان لەدایکبووی یەک چرکە، یاخود دەرئەنجامی پاڵپشتییەکی دەرەکی نییە لە دوای ساڵی 2001ەوە، بەڵکو درێژەپێدانی رێڕەوێکی درێژە کە لە چەند دەیەیەکەوە دەستیپێکردووە 

لە چاوپێکەوتنێکیدا ژنە دەرهێنەری ئەفغانی(رۆیا سادات) کە دەرهێنەری چەند کارێکی سینەمایی بووە، تیشک دەخاتەسەر کۆژانەکانی وڵاتەکەی. هاوکات ئەم خانمە نموونەیەکی پڕشنگداری ژنی ئەفغانی خەباتگێڕە لە پێناو ئازادیی و یەکسانییدا.
رۆیا دووپاتی دەکاتەوە کە خەباتی ژنانی ئەفغانستان لەدایکبووی یەک چرکە، یاخود دەرئەنجامی پاڵپشتییەکی دەرەکی نییە لە دوای ساڵی 2001ەوە، بەڵکو درێژەپێدانی  خه‌باتێكی‌ دوورو درێژه‌ کە لە چەند دەیەیەك له‌مه‌وبه‌ر دەستیپێکردووە، هەروەها وتی: لەسەرەتای مێژووەوە تائێستا، ژنانی ئەفغانستان ئەو هێزە راستەقینەیە بوون کە لە پێناو ئازادیی و یەکسانییدا خەباتیان کردووە، تەنانەت لەسەردەمی فەرمانڕەوایی تاڵیباندا، هەمیشە ژنانی ئەفغانستان لە بەرەکانی پێشەوەدا بوون و دەنگیان بەرامبەر ستەم و چەوسانەوە بڵندکردۆتەوە.
سەرچاوەی هێزی رۆیا ئەزموونێکی تایبەتی خۆیەتی کە کردوویەتی بە نموونەیەک بۆ هیوا و پشوودرێژی، کاتێک لەسەردەمی داگیرکاریی یەکەمی تاڵیباندا، رۆیا رێگریی خوێندنی لێکرا بەڵام ئەو لەرێگای کتێبەکانی باوکییەوە هونەری سینەمای لەماڵەوە خوێند، ئەمڕۆش بۆتە یەکێک لە خانمە دەرهێنەرە بەناوبانگەکانی جیهان و خۆی وەکو هیوایەک بۆ ژنانی ئەفغانستان ده‌بینێت. رۆیا دەڵێت: لە تاریکترین بارودۆخدا، ژن دەتوانێت جیاوازیی دروست بکات.
 ئەگەر ئەو خانمە دەرهێنەرە ئەفغانییە، توانیویەتی لەنێو چوار دیواری ماڵەکەیەوە بگاتە ئاستی ناوبانگێکی جیهانیی، ئەوا هەموو ژنێک مافی خەوبینین و هەوڵدانی بۆ هێنانەدی خەونەکەی هەیە.
یەکەمین کارە سینەماییەکانی رۆیا وەکو سەرەتای كاروانه‌كه‌ی‌ هەژمار دەکرێت بۆ گۆڕینی کۆژانی ژنە ئەفغانییەکان بۆ کۆمەڵە چیرۆکێکی زیندوو و پڕ ژیان لە سەر شاشەکانی سینەمادا، ئەو لە ساڵی 1995دا سیناریۆی یەکەمین فیلمی خۆی نووسی بە ناونیشانی (نامەیەک بۆ سەرۆک) كه‌ له‌شاری‌ «هەرات» كاری‌ وێنه‌گرتنی‌ ئەنجامدرا کە بە یەکێک لە سێ شارە گەورەکەی ئەفغانستان دادەنرێت و دوای چەند ساڵێک لە کارکردن لە مۆنتاژکردنی ئەم فیلمە لە ساڵی 2003دا ئەم فیلمە ئامادەبوو بۆ نمایشکردن.
رۆیا سەبارەت بەم فیلمە دەڵێت:ئەم فیلمە سەرەتایەکی زۆر باش بوو بۆ من، ئەم فیلمە تەنها بریتیی نەبوو لە فیلم، بەڵکو هاوارێک بوو لە زۆربەی فێستیڤاڵە سینەمایەکاندا بیسترا.
رۆیا لەو باوەڕەدایە کە ژنانی ئەفغانستان وەکو سیمبولێکی خەبات دەمێننەوە و دەڵێت: هیچ کاتێک ژنانی ئەفغانستان بێدەنگ نەبوون و خۆیان نەداوە بە دەستەوە، بەڵکو هەمیشە هێزێکی راستەقینە و پتەوبوون به‌رووی ئاڵەنگاریەکاندا».
سەرچاوە: aawsat.com