هەرجارەی تێكۆشەرێك

پێشمەرگەی دێرین، وەستا عەباس خانەقینی

ئامادەكردنی: حەیدەر مەنتك
پـــــرۆفـــــایل

عەباس كەریم محەمەد ناسراو بە وەستا عەباسی مام كەریمی خانەقین، لە دایكبووی ساڵی 1951ی شاری خانەقین و دەرچووی ناوەندییە.
ساڵی 1975 ئاوارەی ئێران بووە و ساڵی 1979 گەڕاوەتەوە و لە شاری كەلار نیشتەجێ بووە.
ساڵی 1980 پەیوەندیی كردووە بە رێكخستنەكانی كۆمەڵەی رەنجدەرانی كوردستانەوە و ساڵی 1983 بۆتە پێشمەرگە لە تیپی 51ی گەرمیان. 
بەشداریی چەند چالاكییەكی كردووە و دووجار بەچەكی كیمیایی بریندار بووە. 
ئێستا خانەنشینە بە پلەی نەقیب و نیشتەجێی شاری هەولێرە.
هەڤاڵ وەستا عەباس خانەقینی، پێشمەرگەیەكی دێرین و دانەبڕاوە، لە بارەی دەستپێكردنی خەباتی پێشمەرگایەتییەوە وتی: ساڵی 1983 بووم بە پێشمەرگە لە مەفرەزەكەی هەڤاڵ سامان گەرمیانی كە فەرماندەی تیپی 51ی گەرمیان بوو، وەك باقی پێشمەرگە، ساردی و گەرمی و نەبوونی و برسێتیی زۆری ئەو رۆژگارەم بینیووە، دواتر بە بڕیاری شەهید شەوكەتی حاجی مشیر كرام بە لێپرسراوی(مەشجەب)ی مەڵبەندی یەك.
یەكێك لەو شەڕانەی بەشداریم تێداكردووە، رۆژێك كۆمەڵێك پێشمەرگە، لەوانە: (دلێر، ئازاد، نازم و خۆم)، بەداخەوە ناوی ئەوانی ترم بیر نەماوە، چووینە سەر ئاوەكەی سیروان تا ئاوبهێنین بۆ بارەگا، لەناكاو دوو ئۆتۆمبێلی جاش دایان بەسەرماندا و تەقەیەكی زۆریان لێ كردین، ئێمەش بڕیاری شەڕی یەكلاكەرەوەمان داو دامەزراین، سامان گەرمیانی و ژمارەیەك لە هەڤاڵان هاتن بەهانامانەوە و لە هێرشێكی پێچەوانە و چڕدا، جاشەكان شكان و هەردوو ئۆتۆمبێلەكەیان بەجێهێشت، ئەو چالاكییە دەنگدانەوەیەكی باشی هەبوو لەو كاتەدا.
وتیشی: یەكێك لەو رووداوە ناخۆشخانەی كە قەت بیرم ناچێتەوە، سەعات 10ی شەوێكی ساڵی 1988 بوو، لەگەڵ كاك هۆشیاری بێتەل لەسەربانی بارەگاكەی شەهید شەوكەتی حاجی مشیر بووین، لەپڕ هێرشی كیمیایی كرایە سەرمان، بەركەوتم و بردیانم بۆ نەخۆشخانەی مەڵبەندی یەكی سلێمانی لە سنووری گوندی جافەران، بۆ بەیانییەكەی بەداخەوە كاك هۆشیار شەهید بوو، ئەوە زۆر ئازاری دام و قەت بیرم ناچێتەوە.
رۆژی دواتر جلو‌بەرگی پاراستنی كیمیاییان پێدام، دیسان هێرشی كیمایی دەستیپێكردەوە و دووبارە بەركەوتم و بردیانم بۆ بارەگایەك لە پشتی گوندی (ئەسیلی سەروو)، رەنگم رەش هەڵگەڕابوو، پاشان بردیانم بۆ تیپی 53ی شێروانە، دكتۆر فایەق گوڵپی بەڕێوەبەری نەخۆشخانەكەی ئەوێ بوو، دەرزییەكی لێدام و چەند دەرزییەكی دیكەی پێدام بۆ كاتی پێویست، كاك عادل شوكر سەرتیپی 53 بوو ناردمی بۆ گوندی (شێخ تەویل)، لەوێ كاك شەماڵ (كە ئێستا بەڕێوەبەری ئاسایشی كفرییە) دەرزییەكانی لێدەدام، زۆر سوپاسی دەكەم، بەڕاستی فریام كەوت، ئەوكاتەش سەختترین قۆناغی پێشمەرگایەتی بوو، ئەنفال و هێرشی كیمیایی پێكەوە دەكرایە سەرمان.
دواتریش وتی: كاتێك هێزی پێشمەرگە كشانەوە بۆ سەرسنوور، من گەیشتبوومە بارەگای مەڵبەندی سێ لە گوندی خەتێی ناوچەی خۆشناوەتی، هاوسەر و چوار منداڵەكەشم لە شێخ تەویل بەجێمابوون، پاش ماوەیەك هاوسەر و دوومنداڵم گەیشتن و دوانەكەی تریش لای دایكم بەجێمابوون لە كەلار.
هەر لەوبارەیەوە، هەڤاڵ عەمید شەماڵ، بەڕێوەبەری ئاسایشی كفری و هاوڕێی پێشمەرگایەتیی وەستا عەباس، وتی: وەستا عەباس و هەریەك لە شەهیدان (كوێخا حسێن و كەمال بێویانی و دكتۆر حەیدەر و كەریم عەلی) و هەروها حەبیب تۆپخانە و ئیسماعیل عەبدولكەریم و وەهابی مام محە و وەستا رەحیم و مامۆستا جەلال حاجی محەمەد و ئەحمەد شامار، هەموویان لە یەك كاتدا هاتن بۆ پێشمەرگایەتی بۆ تیپی 51ی گەرمیان.
رۆژی 23/3/1988 كیمیابارانی ناوچەی قەرەداخ و سێوسێنان و جافەران و بەلەكجاڕ كرا، وەستا عەباس بەسەختی بریندار بوو، بەپێی توانای ئەوكاتە چارەسەری پزیشكیی بۆ كرا، منیش كە شارەزاییەكی سەرەتاییم هەبوو لە بواری دەرزی لێدان و تەداویدا، لەكاتی پێویستیدا چارەسەرم بۆ دەكرد.
ئیتر وردە وردە شەڕ هەموو ناوچەكەی گرتەوە، بەتایبەت شێخ تەویل، رژێم بە هاوەن و تۆپ بوردمانی ناوچەكەی كرد، چەند گوللە تۆپێكی (سیفور) كەوتنە ناو گوندەكەوە و شەڕ بەرپا بوو، وەستا عەباس سەرەڕای برینداربوونی بە كیماییەكە، بەشداریی شەڕی ناوچەكەی كرد لەگەڵماندا كە زنجیرەیەك شەڕی سەخت روویدا، لە قۆڵێكەوە حەمە پارێوڵە سەرپەرشتیی دەكرد و هێزی پێشمەرگە سەركەوتنی گەورەمان تۆماركرد، بەڵام حكومەتی عیراق بەردەوام بوو لەهێرشكردندا.
ئەو هاوڕێیەی وەستا عەباس باسی لەوەكرد لەوكاتەدا زۆرینەی هێزی پێشمەرگە لە شەڕەكانی ناوچەی سەركردایەتی بوون، بۆیە ناوچەكەی خۆیان چۆڵ بووە و ئیتر ئەوانیش لە ناچاریدا و بە بروسكەی مەڵبەند بەچەند قۆناغێك پاشەكشەیان كرد تا گەیشتنە سنووری مەڵبەندی سێی هەولێر.
 وتیشی: ئیتر دوای چەند رۆژێك گەیشتینە سنووری مەڵبەندی سێ و لە گوندی (خەتێ) ماینەوە، دوای ئەوەش لە كۆبوونەوەیەكدا پێمان راگەیەندرا كە بارودۆخ باش نییە و ئەوەی خێزاندارە با بڕوات بۆ سنووری ئێران و سەڵتەكان بمێننەوە، وەستا عەباسیش هەم خێزانداربوو هەم بریندار، ئیتر بە زەحمەتییەكی زۆرەوە و لە ژێر بۆردومانی هێلیكۆپتەردا چووینە ئێران، وەستا عەباسیش چووە شیراز بۆ چارەسەر.