ئا: كوردەوان محەمەد سەعید
لە ماوەی سێ ساڵی رابردووی جەنگی نێوان ئۆكرانیا و روسیادا، جیهان چاوی لەسەر ئابووریی روسیایە، چونكە جگە لەوەی خودی جەنگ هۆكاری سەرەكیی داتەپینی ئابوورییە، روسیاش رووبەڕووی لێشاوی سزا ئابوورییەكانی خۆرئاوا بۆتەوە، لەگەڵ ئەوەشدا تێپەڕاندنی ئەو سێ ساڵە بۆ روسیا ئاسان نەبووە و ناچار بووە چەندین رێگە بگرێتەبەر بۆ ئەوەی ئابوورییەكەی لە داڕمان بپارێزێت، یەكێك لەو رێگایانەش گۆڕینی رێڕەو و ئاراستەی بازرگانییەكەی بووە.
یەكێك لە خاڵە گرنگەكانی ئەم چەند ساڵەی ئابووریی روسیا، سێكتەری بەرگریی روسیا رۆڵی ئەرێنی هەبوو، چونكە بەهۆی خەرجیی زۆری سەربازییەوە، خواستی هەمووەكی لەسەر ئاستی ناوخۆ بەردەوام لە بەرزبوونەوەدا بوو، ئەمەش وایكردبوو هەلی كاری زۆر لەو وڵاتەدا بڕەخسێت، بەڵام هاوشانی ئەم لایەنە ئەرێنییە هەڵاوسانیش بەردەوام لە بەرزبوونەوەدا بوو.
فرۆشتنی نەوت بە قاچاخ
لە بواری پیشەسازیی و بازرگانیدا، روسیا لەو سێ ساڵەدا دوانەكەوتووە، چونكە بە درێژایی ئەو ساڵانە كارگەكانی روسیا لە كاردا بوون و بەرهەم و كەرەستەی خاوی جۆراجۆری پێشكەش بە جەنگ كردووە، بۆ چارەسەری كێشەكانی پەیوەست بە بازرگانیش، لەلایەك روسیا بە رێگەی نایاسایی و لە رێی كەشتییە قاچاخەكانەوە بە پلەی یەكەم نەوتی فرۆشتووە و دوای نەوتیش غاز و نیكل و پلاتینی فرۆشتووە، بەو شێوەیەش داهاتێكی باشی بەدەستهێناوە.
هەر لە بواری بازرگانیدا روسیا، كە پێشتر ئەوروپای كردبووە بازاڕی سەرەكی بۆ ساغكردنەوەی كاڵاكانی، لە 2023وە ئاراستەی بازرگانییەكەی لە ئەوروپاوە گۆڕا بۆ هیندستان و چین، بە تایبەتیش لە بواری وزەدا ئێستا چین و هیندستان دوو گەورەترین بازاڕی ساغكردنەوەی نەوت و غازی روسیان، گۆڕینی ئاراستەی بازرگانیی روسیا، بووە هۆی ئەوەی ئابووریی ئەو وڵاتە بە پتەوی بمێنێتەوە و لە داڕمان بەدوور بێت.
سەرچاوە: سكای نیوز
