تیمی شارەزوور کە پێکهاتبوون لە سێ یاریزانی فێرگەی کیک بۆکسینگی شارەزوور و فێرگەی کیک بۆکسینگی ناحیەی زەڕایەن، لە سلێمانی بەشداریی پاڵەوانێتیی کیک بۆکسینگی (RFL10) یان کرد، پاڵەوانێتییەکە چەندین یاریزانی کوردستان و عیراق و ئێران بەشدارییان تیاداکرد، ماوەی 3 ڕۆژ بەردەوام بوو، ئەو سێ یاریزانەش، یەکێکیان پلەی یەکەمی و دوانیشیان پلەی دوەمیان بەدەستهێنا.
ڕۆژان ئیبراهیم، کە یەكێک بوو لە کچە یاریزانە بەشدارەکان، بەکوردستانی نوێی راگەیاند: تەمەنم 16 ساڵە، یاریزانی کیک بۆکسینگم، لەو پاڵەوانێتییەی شاری سلێمانی بەشدار بووم، بەرامبەر کچە یاریزانێکی ئێران یاریمکرد، توانیم لێی ببەمەوە و پلەی یەکەمم بەدەستهێنا.
وتیشی: جگە لەم پاڵەوانێتییە، لە 4 پاڵەوانێتیی تریشدا لە ئێران بەشدار بووم و پلەی یەکەمم بەدەست هێناوە، بەم پاڵەوانێتییەوە، بەشداری 5 پاڵەوانێتیم کردووە و هیچ یارییەکم نەدۆڕاندووە، ئەوەشی خستەڕو: ئامادەکاریی دەکەم بۆ پاڵەوانێتی (RFL11) کە لە داهاتوییەکی نزیکدا رێکدەخرێت.
ئوسامە خاڵۆ قادر، راهێنەری نێودەڵەتیی کیک بۆکسینگیش بە کوردستانی نوێ -ی ڕاگەیاند: ماوەی 14 ساڵە بەردەوامم لەم بوارەدا، مامۆستای فێرگەی کیک بۆکسینگم لە قەزای شارەزوور، هۆڵەکەمان زیاترلە 70 یاریزانی کوڕ و کچ لە خۆ دەگرێت، بە دوو یاریزان بەشداریم لەم پاڵەوانێتییەدا کرد، ڕۆژان ئیبراهیم پلەی یەکەم و توانا فاتیح -یش پلەی دووەمی بەدەستهێنا.
محەمەد عەبدولرەحمان - شارەزوور
