وانەکانی خولەکە به‌شێوازێکی زانستی وترانەوە

خولێك بۆ راهێنه‌رنی هۆڵه‌كانی له‌شجوانی

سدیق عه‌واڵی


رۆژی 18- ی شوباتی 2025، له‌ سلێمانی و به‌ سه‌رپه‌رشتیی لقی سلێمانی یه‌كێتیی له‌شجوانی و لێهاتویی جه‌سته‌یی، خولێكی راهێنه‌ریی بۆ بەدەستهێنانی بڕوانامه‌ی قۆناغی پله‌ (A) به‌ڕێوه‌چوو.
خوله‌كه‌ چوار رۆژی خایاند، ده‌یان راهێنەری هه‌ڵگری بڕوانامه‌ی پله (C و B) هۆڵه‌كانی له‌شجوانی سلێمانی و ده‌وروبه‌ری به‌شدارییان تیایدا كرد.
 وانەکانی خولەکە لەلایەن مامۆستایانی شاره‌زا و پسپۆڕانی هونه‌ره‌كانی له‌شجوانی و جه‌سته‌وه‌، به‌شێوازێکی زانستی وترانەوە و رێنمایی ته‌واو بە بەشداربووانی خولەکەدرا و چۆنێتی راهێنانی به‌شه‌كانی جه‌سته‌ و فریاگوزاریی بۆ  فێرخوازان  خرانه‌ڕوو.
له‌ رۆژی كۆتایشدا، رێكخراوی  (YGO)كه‌ یارمه‌تی سەرجەم بواره‌كانی وه‌رزش ده‌دات، بڕوانامه‌ی رێزلێنانی به‌خشی به‌ مامۆستایان و چه‌ند كه‌سایه‌تییه‌كی بواره‌كه‌. 
محه‌مه‌د عوسمان سه‌رۆكی لقی سلێمانی یه‌كێتیی له‌شجوانیی و لێهاتوویی جه‌سته‌یی،  بە كوردستانی نوێ رایگه‌یاند: بۆ خولی پراكتیكی و ئه‌نجامدانی تاقیكردنه‌وه‌ی ئەم فێرخوازانەی به‌شداربوون، كاتێكی تر دیاریی ده‌كرێت بۆ تاقیکردنەوەکان بە ‌هه‌ردوو شێوازی تیۆریی و پراكتیكی و ئەوسا سه‌ركه‌وتووەکان بڕوانامه‌ی پله‌ (A) وه‌رده‌گرن.