لە نێوان رۆژانی 21 و 22 – ی ئەم مانگە لە قەتەر پاڵەوانێتییەكی دۆستانەی جومبازی خانمان رێكخراو تیپی هەڵبژاردەی سلێمانیش یەكێك بوون لە تیپە بەشدارەكان و ئەنجامی باشیان تۆماركرد.
عەلی هەتمی سەرۆكی یەكێتیی جومبازی قەتەر بۆ كەناڵەكانی راگەیاندن وتی: ئەم پاڵەوانێتییە لە ئەكادیمیای ئاسپایەر لە قەتەر دەبێت، پاڵەوانێتییەكی دۆستانەیە، پێنج ئاستی تەمەن لە منداڵانەوە تا لاوان و پێشكەوتووان، بەشدار دەبن، پاڵەوانێتییەكە باشترین هەلە بۆ ئەوەی سەرجەم تیپ و یانە و ئەكادیمیاكانی یاریی جومباز لەوڵاتانی بەشدار، ئاستی خۆیان ببیننەوە و ئاستی خۆیان هەڵبسەنگێنن و لە تواناكانی یاریزانانی خۆیان ئاگادار بن و بزانن گەیشتونەتە چ ئاستێكی هونەری.
تیپەكانی شەش وڵات (قەتەر، لوبنان، سعودیە، ئوردون، ئیمارات، كوەیت، عیراق) بەشداریی ئەم پاڵەوانێتییە بوون، كەسەرجەم 16 تیپ بوون، لە نێویاندا تیپی هەڵبژاردەی سلێمانی وەك تیپێكی عیراق بەشداریی كرد و پێشبڕكێیەكانیش بە سیستمی ئەمریكی بەڕێوەبرا.
ئەو 16 تیپەی بەشداری پاڵەوانێتییەكەیان كرد، بە 225 كچە یاریزانی تەمەن جیاجیا لە منداڵانەوە تا لاوان بەشدارییان كرد، كچانی هەڵبژاردەی سلێمانیش بەچەند كچە یاریزانێكی تەمەن جیاجیا بەشداربوو، ئەم تیپەی سلێمانی توانی 14 میدالی زێڕ و 18 میدالی زیو و 21 میدالی برۆنز بەدەستبهێنێت.
دیارترین وڵاتی بەشدار لوبنان بوو، یانەی زیرۆ گرافیتی 58 میدالی بردەو لە نێویدا 40 میدالی زێڕ، تیپێكی تری لوبنان بەناوی فلیكس زۆن ئەمیش 38 میدالی بردەوە لەنێویدا 28 میدالی زێڕ، ئەكادیمیاكانی قەتەری وڵاتی میوانداریكەریش چەندین میدالی زێڕ و زیو و برۆنزی ئەم پاڵەوانێتییەیان بردەوە.
