دوو هەواڵی خورماتوو

یارییەکی کۆتایی
چەند رۆژێک لەمەوبەر، لە یاریگای خورماتوو، بە ئامادەبوونی جەماوەرێکی زۆر، کۆتایی بە خولێکی تۆپی پێی تیپە میللییەکان هات، یاریی کۆتایی خولەکەش، هەردوو تیپی حەمرین و ئامرلی کردیان و حەمرین بە پەناڵتی 5-3 لە ئامرلی بردەوە و بووبە پاڵەوانی خولەکە، لەکۆتاییشدا خەڵات بەسەر تیپە براوەکان و سەرپەرشتیارانی خولەکەدا دابەشکرا، شایانی باسە خولەکە لەسەر ئەرکی لیژنەی تیپە میللییەکانی خورماتوو رێکخرابوو.

تیپی کاراتێی خورماتوو خەڵات کرا
مەڵبەندی حەمرین -ی یەکێتیی نیشتمانیی کوردستان، تیپی کاراتێی خورماتوو خەڵاتکرد، ئەوەش لەپای ئەو سەرکەوتنانەی کە لە چەند پاڵەوانێتییەکدا لەسەر ئاستی عێراق بەدەستی هێنابوو.
مەلا کەریم شکور لێپرسراوی مەڵبەندی حەمرین لە خورماتوو بە کوردستانی نوێی راگەیاند: ئێمە لە خورماتوو، شانازی بەم کۆمەڵە لاوە وەرزشکارەوە دەکەین کە لە بواری وەرزشدا نوێنەرایەتیی ئێمە دەکەن و تەنها  بەناوی خۆیانەوە سەرکەوتن بەدەست ناهێنێن، بەڵکو بەناوی شارەکە و ئێمەشەوە ئەو سەرکەوتنانە تۆمار دەکەن، بۆیە پێویستە ئێمە رێزیان لێی بگرین و خەڵاتیان بکەین.
عومەر ئاوارە