رۆژنامەی کوردستانی نوێ، لە پەرۆشیی بۆ گەیاندنی کێشە و گرفتەکانی هاووڵاتیان بۆ بەرچاوی لێپرسراوان لاپەڕەیەکی تایبەتی تەرخانکردووە، کێشەی کەمیی خزمەتگوزاری کۆڵان، گەڕەک، شەقام، گوند، قەزا، ناحیە و شارەکانی هەرێمی تێدا بڵاودەکاتەوە، بە ئامانجی راستەوخۆ گەیاندنی بۆ بەرچاوی لێپرسراوان و چارەسەرکردنی.
ئامادەکردنی/ محەمەد رەزا
محەمەد عەبدولڕەحمان
دانیشتوانی شێخان، سوپاس و داواکارییان بۆ شارەوانی هەیە
دانیشتوانی گەڕەكی شێخان لە شاری سلێمانی، لەگەڵ ئەوەی سوپاسی شارەوانی دەکەن بۆ قیرتاوکردنی کۆڵانەکانیان، داواکارییەکیشیان هەیە.
ژمارەیەک لە دانیشتوانی گەڕەکی شێخان بۆ کوردستانی نوێ وتیان: شارەوانی لە کاتی قیرتاوکردنی گەڕەکەکانماندا شەقامێکیان بیرچووە، کە لە باخچەی شەهید عوسمان ماوەتییەوە دەستپێ دەكات بەرەو شەقامی هاوكاری، رێگەی هاتوچۆی سەرەكیی سەرجەم ماڵەكانی ئەو گەڕەکانەیە بۆ شەقامی شەست مەتری، داوا دەکەین قیرتاوی بکات.
گەڕەكی شێخان لە شاری سلێمانی
دانیشتوانی گەڕەکێکی دەربەندیخان داوای قیرتاوکردن دەکەن
گەڕەکی 102ەکان لە قەزای دەربەندیخان، لە ساڵی 2008 ئاوەدانکراوەتەوە، زیاتر لە 1000 ماڵی تێدایە، هاووڵاتیانی گەڕەکەکە گلەییان لە کەمیی خزمەتگوزاری هەیە .عەلی والی دانیشتووی گەڕەکی 102ەکان بۆ کوردستانی نوێ وتی: سەرجەم کۆڵانەکانی گەڕەکەکەمان گڵە و داوای قیرتاوکردنی دەکەین، لەگەڵ دروستکردنی گۆڕەپانێکی یاریکردن بۆ گەنجان.
گەڕەکی 102ەکان لە قەزای دەربەندیخان
گوندنشینانی تەپەڕەش داواکارییان هەیە
گوندی تەپەڕەش سەر بە قەزای سەیدسادق، زیاتر لە 400 ماڵی تێدایە و دانیشتوانەکەی نزیکەی 1000 کەس دەبێت، بەهۆی کەمیی خزمەتگوزارییەوە گوندنشینان گلەییان هەیە.
محەمەد عەبدولکەریم دانیشتووی گوندی تەپەڕەش بۆ کوردستانی نوێ وتی: کۆڵانەکانی گوندەکەمان و سەرجەم رێگەوبانەکەی گڵە و داوای قیرتاوکردن و فراوانکردنی دەکەین.
وتیشی: گوندەکەمان لە خزمەتگوزارییەکانی، بنکەی تەندروستی و باخچەی ساوایان بێبەشە و داوا لە لایەنی بەرپرس دەکەین خزمەتگوزاریی بگەینێتە گوندەکەمان، بۆ ئەوەی بە تەواوی چۆڵ نەبێت.
گوندی تەپەڕەش سەر بە قەزای سەیدسادق
کەمیی خزمەتگوزاری لە گوندی بێستانسوری کۆن
گوندی بێستانسوری کۆن سەر بە ناحیەی عەربەت، لە ساڵی 1930 ئاوەدانکراوەتەوە، زیاتر لە 182 ماڵی تێدایە، بەهۆی کەمیی خزمەتگوزارییەوە گوندنشینان گلەییان هەیە.
تەها قادر ئەنجومەنی گوندی بێستانسوری کۆن بۆ کوردستانی نوێ وتی: گوندەکەمان پرۆژەی ئاو و ئاوەڕۆی نییە و داوا لە لایەنی بەرپرس دەکەین بۆمان دروست بکات، هەروەها بەشێکی کۆڵانەکانمان گڵە و داوای قیرتاوکردنی دەکەین.
وتیشی: داوای دروستکردنی گۆڕەپانێكی تارتان دەکەین، لەگەڵ قوتابخانەی ئامادەیی، داوا لە لایەنە بەرپرسەکان دەکەین سەرجەم خزمەتگوزارییەکان بگەیەننە گوندەکەمان.
گوندی بێستانسوری کۆن سەر بە ناحیەی عەربەت
گوندنشینانی زێوێ خزمەتگوزارییان دەوێت
گوندی زێوێ بەهۆی کەمیی خزمەتگوزارییەوە ئێستا 25 ماڵی تێدایە.
هێرش ستار دانیشتووی زێوێ بۆ كوردستانی نوێ وتی: زێوێ لەگەڵ ئەوەی ناوچەیەكی گەشتیارییە، بەڵام خزمەتگوزاری زۆر كەمە، شەقامی سەرەكی گوندەكە قیرەکەی خراپ بووە و پێویستی بە چاککردنە، هەروەها چەند کۆڵانێکی گوندەکە گڵە و پێویستی بە کۆنکرێت کردنە.
وتیشی: گوندەکەمان پرۆژەیەكی ئاوی هەیە، بەڵام زۆرباش نییە و پێویستمان بە هەڵکەندنی بیرێکی ئیرتیوازییە، هەروەها دابینکردنی دەرمان بۆ بنکەی تەندروستی گوندەکەمان لەگەڵ دروستکردنی گۆڕەپانێکی تارتان بۆ گەنجانی گوند و داوا لە وەزارەتی کشتوکاڵ دەکەین هاوکاریی جووتیاران بکەن.
گوندی زێوێ، ناوچەیەکی گەشتیاری
داواکاریی دانیشتوانی سەرچنار
سەرچنار گەڕەکێکی سلێمانی و شوێنێكی گەشتیارییە، پێویستی بە خزمەتگوزارییە.
حسامەدین عومەر موختاری گەڕەكی 119 و 12 ی سەرچنار بۆ كوردستانی نوێ وتی: كۆڵانی (5) لە گەڕەكی 119، شەقامی 69 ی شنۆ، شەقامی 67 ی سۆلاڤ، كۆڵانەكانی 23، 6 ، 25 و 61 لە گەڕەكی 121 لە سەرچنار، سەرجەمیان قیرەکەیان خراپ بووە و پێویستیان بە قیرتاوکردنەوەیە.
وتیشی: ئەوەی زۆر گرنگە بازاڕەكەی سەرچنار تا دەگاتە مەركەزی پۆلیسەكە، بە تەواوی قیرتاو بکرێت نەک پینەکردن، هەروەها سەرچنار گرفتی کەمیی ئاوی خواردنەوەی هەیە و پێویستە چارەسەر بکرێت.
ئاماژەی بەوەشکرد، بازاڕی قەیسەرییەکەی سەرچنار پێویستی بە تازەکردنەوەیە، لەبەرئەوەی زۆر تێکچووە و بەهۆی ئەوەی ناوچەیەکی گەشتیارییە گەشتیاران بە بەردەوامی سەردانی دەکەن، هەروەها سەرچنار پێویستی بە سەوزکردنی زیاترە، داوا لە لایەنی بەرپرس دەکەین ئەو شوێنانەی لە گەڕەكەكاندا بۆ باخچە دیاریکراون بە زوویی کاریان تێدا بکرێت و سەوز بکرێن.
گەڕەکی سەرچنار لە شاری سلێمانی
