وەڵامێک بۆ ئەو بابەتەی کە لە رۆژنامەی کوردستانی نوێ بە ناونیشانی (سەرپێچییەکانی هاتوچۆ لە شار بۆتە نەریت) بڵاوکراوەتەوە، لە رۆژی 26/2/2025 گۆشەی هاتوچۆسازی، نووسینی هەڵکەوت عەبدوڵڵا.
ئێمە وەک بەڕێوەبەرایەتی هاتوچۆی سلێمانی دەپرسین نووسەر کاتێک دەڵێت: لە ماوەی دوو ساڵی رابردوودا سەرپێچییەکانی هاتوچۆ لە شاری سلێمانی لە هەڵکشاندایە بەڕادەیەک بوونەتە نەریت و هەڕەشەیە بۆ سەلامەتیی هاتوچۆ، ئێمە لە وەڵامدا دەپرسین نووسەر پشتی بە چ داتایەک بەستووە؟ ئەگەر لە بەردەستێتی با بیخاتەڕوو! ئەگەر نا ئەوا بێگومان بۆچوونی شەخسی خۆیەتی و بەهەند وەرناگیرێت.
بەشێک لە قسەکانی کە پەیوەندیی بە ئۆتۆمبێلی بێ سەرەتاوە هەیە، ئەمیان تاڕادەیەک راستە، بەڵام ئەم کەیسە دۆخێکی گشتییە لە هەرێمی کوردستان و تەنها پەیوەست نییە بە پارێزگای سلێمانی و چارەسەری لە کۆتاییدا بە دەست وەزارەتی ناوخۆیە، هەر بۆ زانیاری نووسەری بابەتەکە ئەم کێشەیە بە تایبەتی بەرۆکی بە هەموو عیراق گرتووە و تا ئەمڕۆ بە هەڵواسراوی ماوەتەوە.
کاتێک باس لەوە دەکات، ئاستی لێپرسینەوەی کارمەندانی هاتوچۆ کەمبووەتەوە و ساردبوونەوە دروست بووە، ئەمەشیان ناڕاستە و ئەفسەر و کارمەندانی هاتوچۆی سلێمانی سەرەڕای هەموو ئەو گرفت و ئاستەنگانەی خۆی ئاماژەی پێکردووە، بەردەوامن لەسەر ئەرک و فەرمانەکانیان و سستیشیان نەنواندووە.
سەبارەت بە پرسی پێدانی مۆڵەتی شۆفێریی و ئاستی پێگەیاندنی شۆفێر، لە راستیدا ئەم خاڵەیان زۆر جێی سەرسوڕمانمانە، لەبەرئەوەی هەر کەموکورتییەک کە باسی لێوە دەکات پشکی شێر بەر خودی بەڕێزیان دەکەوێت کە خۆی لە رابردوودا (کاری لەسەر رێبەری لێخوڕین کردووە و زیاتر کاری وەرگێڕانی تیا بووە لە زمانی دانیمارکی بۆ کوردی - ترایی و تیۆری - کە ساڵانێکی زۆری بە سەردا تێپەڕیوە و ئێمەش دەڵێین، لەگەڵ سەردەمی ئەم رۆژگارەدا ناگونجێت، بەڵام و بۆ زانیاریی خوێنەران ئێستا لەلایەن (ناوەندی تۆتاڵ بۆ راھێنان و پەرەپێدان) بە مۆڵەتی رەسمی وەزارەتی ناوخۆی حکومەتی هەرێمی کوردستان چاکسازی راستەقینە و بابەتی لە سستمی مۆڵەتی شۆفێرییدا کراوە، ناوەندەکە رەسمی و مۆڵەت پێدراوە لە پارێزگاکانی هەرێمی کوردستان، ژمارەیەکی بێشومار لە راھێنەر و مامۆستای پێگەیاندووە و تەنانەت سەرجەم ئەفسەرانی بەشەکانی مۆڵەتی شۆفێری بڕوانامەی رەسمی و پەسەندکراویان بە دەستهێناوە لەلایەن وەزارەتی ناوخۆ و بەڕێوەبەرایەتیی گشتیی هاتوچۆی هەرێمی، ئێستا و بە شێوەیەکی یەکگرتوو و بەپێی رێنمایی و بڕیارەکانی وەزارەتی ناوخۆ لە سەرجەم بەڕێوەبەرایەتییەکانی هاتوچۆ لە هەرێمی کوردستان پەیڕەو دەکرێت و پەیتا پەیتا رەنگدانەوەی بەرجەستە دەبێت لەسەر شەقام و رێگەوبانەکان، لە سستمێکی لۆکاڵی کراوەتە سستمێکی کوردستانی، لە کۆتاییدا پرسیارێکی گشتیمان لەلا دروست بووە کە ناوبراو لە کۆتایی بابەتەکە خۆی وەک (شارەزای بواری هاتوچۆ) ناساندووە.
پێمان خۆشە بە چ پێوەرێک ئەم ناونیشان و نازناوە زانستییەی بۆ خۆی داتاشیوە، با بڕوانامە ئەکادیمی و رەسمییەکانی بۆ هەموولایەکمان بە گشتیی و خوێنەرانی رۆژنامەی کوردستانی نوێ و میدیاکان بخاتەڕوو، ئەگەر هەیەتی، هەروەها بە راشکاوی ئەوەش دەڵێین، کە پێشنیاز و رەخنە و قسەکردنی بریقەدار و وتاری پشت لاپتۆپ و ژووری گەرم و دوور وڵات و تاراوگە زۆر ئاسانە، چاکسازیی و کارکردنی راستەقینە لەسەر ئەرزی واقیع و بێ مووچەیی، سەرەڕای هەموو کێشەکانی ژیان و نەهامەتییەکانی ئەفسەران و کارمەندانی هاتوچۆ بە سەرماو گەرما سەنگی مەحەکە.
بەڕێوەبەرایەتیی هاتوچۆی سلێمانی
