راپۆرتی/ ئەسرین محەمەد
ساڵانە لەگەڵ هاتنی مانگی رەمەزان، یاخود لە کاتی بۆنەکاندا نرخ لەناو بازاڕەکاندا بەرزدەبێتەوە، لەبەرئەوەی خواست لەسەر کەلوپەل و شتومەکەکان زیاد دەکات، فرۆشیاران بە هەلی دەزانن و بە رێژەیەک نرخی شتومەکەکان بەرز دەکەنەوە، لیژنەکانی قایمقامیەتیش لە پارێزگاکان بە ئامانجی رێگریکردن لە بەدواداچوون بەردەوامن و سزای سەرپێچیکاران دەدەن.
لە هەرێمی کوردستان هەر کەسێک کەرەستەی ماوە بەسەرچوو بفرۆشیت، یان نرخ بەرزبکاتەوە بەسەرپێچی تۆمار دەکرێت، سزاکەشی داخستن یان سزای مادییە و هەندێکجار خاوەنەکەشی دەدرێتە دادگا
پێکهێنانی لیژنەی تایبەت لە سلێمانی
قایمقامیەتی سلێمانی بۆ رێگریکردن لە بەرزکردنەوەی نرخ، لیژنەیەکی کاتیی تایبەت بە مانگی رەمەزان پێکهێنا، کە نوێنەری هەریەک لە قایمقامیەتی سلێمانی، ئاسایشی سلێمانی، بەڕێوەبەرایەتی گەشتوگوزار، چاودێری بازرگانی تێیدا بەشدارن و کاری لیژنە هاوبەشەکان تەواو دەکەن.
لە کۆنگرەیەکی رۆژنامەوانیدا ئاوات محەمەد قایمقامی سلێمانی رایگەیاند: ئەم لیژنەیە کاتیی دەبێت، تایبەتە بە مانگی رەمەزان و ئەرکیشیان بریتییە لە چاودێریکردنی شوێنە گشتییەکان و رێگریکردن لە بەرزبوونەوەی نرخ.
وتیشی: سەرجەم لیژنەکانی سەر بە لیژنە هاوبەشەکان رادەسپێرم، بەردەوامبن لەسەر ئەرکی چاودێریکردنیان و بەدواداچوون بۆ نرخ و کوالیتی خۆراک و سەرجەم پێداویستییەکان، بۆ ئەوەی لە مانگی رەمەزاندا رێگری لە ساغبوونەوەی خۆراک و کاڵای ماوەبەسەرچوو بکەن.
هاووڵاتی ئالان عەبدول بۆ کوردستانی نوێ وتی: لە هەر بۆنەیەکدا حكومەت بەرپرسی یەكەمە لە كۆنترۆڵكردنی نرخ و بازاڕدا، بۆئەوەی لەم بێ مووچەییەدا فرۆشیاران نەتوانن بە ئارەزووی خۆیان یاری بە نرخی خۆراک و کەلوپەلەکان بکەن و هاووڵاتیانیش بتوانن بەپێی توانای گیرفانیان پێداویستییەکانیان بکڕن.
گرتنەبەری رێکاری یاسایی
لایەنە بەرپرسەکان لە پارێزگای هەولێر بە سەرپەرشتی پارێزگار کۆبوونەوەی تایبەت بە مانگی رەمەزانیان کرد، دواى گفتوگۆکردن لە بارەى دۆخی بازاڕ و نرخ و جۆرەکانى خۆراك و پێداویستییەکانى هاوڵاتییان، جەختیان لە توندکردنى رێکارەکانی چاودێریکردنی بازاڕ و نرخی کەلوپەل و پێداویستییەکانی هاوڵاتییان لە هەموو شوێنەکان کردەوە.
قایمقامیەتى قەزای ناوەنديى هەولێر رایگەیاند، لیژنەی قایمقامیەتەکان، بازرگانى، شارەوانى، تەندروستى و لایەنەکانى دیکەى پەیوەندیدار، بەردەوام دەبن لە چاودێریکردنی بازاڕ و رێگە بە هیچ کەسێک نادرێت، یاری بە بازاڕ بکات و نرخی خۆراک و کەلوپەل و پێداویستی لەسەر هاووڵاتییان گران بکات.
ئاماژەی بەوەشکردووە، رێکارى یاسایی بەرامبەر هەموو ئەو کەس و لایەنانە دەگیرێتەبەر کە نرخی خۆراک و پێداویستی لەسەر هاووڵاتییان زیاد دەکەن، هەروەها لە پێناو پاراستن و سەلامەتى گیانى هاووڵاتیان و رێگەگرتن لە ساغکردنەوەی خۆراکی ماوه‌بەسەرچوو و بێ کوالێتی، بەدواداچوون و پشکنین بۆ کۆگاکانى خۆراک ، دەرمان ، مۆڵ، مارکێت و شوێنەکانى دیکەى هاوشێوەیان لەناو شار و دەرەوەى شار بەردەوام دەبێت.
بەدواداچوونی لیژنەکان لە دهۆک و هەڵەبجە
لە هەرێمی کوردستان هەر کەسێک کەرەستەی ماوە بەسەرچوو بفرۆشیت، یان نرخ بەرزبکاتەوە بەسەرپێچی تۆمار دەکرێت، سزاکەشی داخستن، سزای مادییە و هەندێکجار خاوەنەکەشی دەدرێتە دادگا.
لە پارێزگای دهۆکیش لیژنەی پەیوەندیدار کۆبوونەوە و ئیسماعیل محەمەد قایمقامی قەزای دهۆک رایگەیاند: لە مانگی رەمەزاندا لیژنەکانی قایمقامیەت بەدواداچوونەکانیان لە بازاڕدا توندتر دەکەن بۆ رێگریکردن لە بەرزکردنەوەی نرخ و دەستگرتن بەسەر کەرەستەی ماوە بەسەرچوو و بێ کوالێتیدا.
هەموو ئەو هەنگاوانەی لایەنە بەرپرسەکان لە سەرجەم بازاڕەکانی هەرێمی کوردستاندا دەیگرنەبەر پێویستیی بە هاوکاری هەموانە، بە پابەندبوون بە رێنماییەکان و چاو کراوەیی هاووڵاتیانیش بە ئاگادارکردنەوەی لیژنە پەیوەندیدارەکان لە کاتی بینینی هەر سەرپێچییەکدا.
لیژنە هاوبەشەکانی قایمقامییەتی هەڵەبجەش کارەکانیان بۆ رێگری لە گرانی و ساغکردنەوەی شتومەکی ماوەبەسەرچوو چڕ دەکەنەوە و رێگەنادەن کەس نرخ گران بکات و رایانگەیاند، هەموو فرۆشگاکان ناچار دەکەین نرخ هەڵبواسن، ئەوەش بۆ رێگرییە لە بەرزکردنەوەی نرخ لە مانگی رەمەزاندا.
گرانكردنی نرخ تاوانە
لە ئایینی ئیسلامدا بەرزكردنەوەی نرخی كاڵا و خواردەمەنی و قۆرخکاری تاوانە، یەكێتیی زانایانی ئایینی ئیسلامی كوردستان داوا لە بازرگانان و دوكانداران دەکەن نرخی كاڵا و خواردەمەنییەکان گران نەكەن.
عەبدوڵڵا شێركاوەیی وتەبێژی یەكێتیی زانایان رایگەیاند، بەرزكردنەوەی نرخی كاڵا و خواردەمەنی پێچەوانەی رەوشتی كۆمەڵگەی مسوڵمانان و شەریعەتی ئیسلامە.
وتیشی: بەرزكردنەوەی نرخی كاڵا و خواردەمەنی لە مانگی رەمەزاندا تاوانە، بەپێی شەریعەتی ئیسلام قۆستنەوەی بازاڕ و هەڵگرتنی كاڵا بۆ گرانكردنی نرخ رێگەپێنەدراوە، هەروەها پێویستە بازرگانان لەم مانگەدا زیاتر بەرپرسیارێتییان لەبەرچاو بگرن و رەوشتی ئایینی و كۆمەڵایەتییان بپارێزن.
