ئا: كوردەوان محەمەد سەعید
د. بێستون سابوراوایی بۆ کوردستانی نوێ :هەر هەنگاوێك بە ئاراستەی چارەسەری كێشە سیاسییەكان و كێشەی كورد بێت لە توركیا، بێگومان كاریگەریی دەبێت لەسەر كەمكردنەوەی بودجەی سەربازیی و ئەوەش كاریگەریی دەبێت بۆ سەر بەهێزكردنی لیرەی توركی
عەبدوڵڵا ئۆجەلان هەر لە زیندانەوە پەیامێكی ئاراستەی پەكەكە كرد و داوای لێكرد، چەك دابنێت و كێشەی كورد لە توركیا بە رێگەی ئاشتییانە چارەسەر بكرێت، ئەم پەیامە چەند رۆژێكە زۆربەی میدیاكانی بەخۆیەوە سەرقاڵكردووە، بەڵام لە رووی ئابوورییەوە پرسیاری جەوهەری ئەوەیە: پەیامەكەی ئۆجەلان و چەكدانانی پەكەكە، تا چەند كاریگەریی لەسەر ئابووریی ئەو وڵاتە دەبێت؟
د. بێستون سابوراوایی پسپۆڕی بواری ئابووری، لە لێدوانێكی تایبەتدا بۆ كوردستانی نوێ وتی: بێگومان هەموو ئارامییەكی سیاسی كاریگەریی پۆزەتیڤی دەبێت لەسەر ئابووریی و بەرزبوونەوەی دراوی ئەو وڵاتەوە و بەرامبەر بە دراوی وڵاتانی دیكە نرخەكەی بەرز دەكاتەوە، كاریگەریی پەیامەكەی بەرێز ئۆجەلان تا ئێستا تان و پۆی دیار نییە، بەڵام ئەگەر ببێتە شتێكی جددی بە ئاراستەی چارەسەری كێشەی كورد لە توركیا، بە دڵنیاییەوە كاریگەریی دەبێت لەسەر دراوی توركیا.
ئەو پسپۆڕە ئابوورییە ئاماژەی بەوەشكرد، ئێستا لیرە توركی لە ئاستێكی زۆر نزمدایە، ئەویش بەهۆی ئەو سیاسەتە فراوانخوازییەی حزبی ئاك پارتی و مەهەپەوەیە، كە كار بۆ ئەوە دەكەن توركیا بەردەوام لە شەڕدا بێت، چاویان لە داگیركردنی وڵاتانی دیكەیە، دەیانەوێ لە سوریا و لیبیا و وڵاتانی دیكەی ئەفریقاش دەسەڵاتیان هەبێت، ئەمە وایكردووە ئابووریی وڵاتەكەیان وردە وردە بەرەو داڕوخان بچێت، لەبەر ئەوەی توركیا لەو وڵاتانە نییە كە خاوەنی ئابوورییەكی بەهێزن، وەك ئەمریكا و ئەڵمانیا و چین، تا جموجۆڵە سیاسییەكانیان كار نەكاتە سەر ئابوورییەكانیان و بگرە بە قازانجیش بۆیان بگەڕێتەوە، بەڵكو ئەمەی توركیا دەیكات بارگرانییەكی زۆر لەسەر بودجەی گشتیی وڵاتەكەی دروست دەكات.
لەبەر ئەو هۆكارانە هەر هەنگاوێك بە ئاراستەی چارەسەری كێشە سیاسییەكان و كێشەی كورد بێت لە توركیا، بێگومان كاریگەریی دەبێت لەسەر كەمكردنەوەی بودجەی سەربازیی و سەرەنجام كاریگەریی دەبێت بۆ سەر بەهێزكردنی لیرەی توركی.
