عوسمان ساوجی
لەم سەردەمەدا هاووڵاتییان بۆ بازاڕکردن دەتوانن تەنها لە یەکێک لە سۆپەر مارکێتە گەورەکانی گەڕەکەکەیاندا زۆربەی ئەو کاڵا و شمەکانە بکڕن کە بۆ مانگێک پێویستییان پێیەتی، چونکە زۆرێک لەو بازاڕانە لەسەر رووبەرێکی فراوان دروست کراون و هەیانە لە چەند نهۆمێکیش پێکهاتووە، کە ئەوەش وایکردووە تەنانەت جل و بەرگ و پێداویستییەکانی تریش بەردەست بن، بەشێک لەم بازاڕانە پاڵپشت بە سیستمی بازاڕی ئازاد لە چەندین وڵاتی جیاواز و بە کوالێتی و نرخی جیاواز کاڵاکان بۆ کڕیاران دەخەنەڕوو.
بۆ هاووڵاتییانیش بازاڕکردن جگە لەوەی بۆ پڕکردنەوە پێداویستییەکانە لە هەمان کاتدا ئەنجامدانی چالاکییەکی کۆمەڵایەتییە و پشوویەکیشە بۆ ئەوانەی بە خێزانی، یان لەگەڵ هاوڕێکانیان ئەم کارە دەکەن، کە ئەوەش جێگەی بایەخ و گرنگییە، بەڵام لەگەڵ ئەوەشدا دەکرێت هاووڵاتی بە ئاگاییەوە کاڵاو شمەکەکانیان بکڕن و رەچاوی چەند خاڵێک بکەن کە لێرەدا دوان لە گرنگترینیان دەخەینە روو:
نیشتمانەپەروەری
یەکەمیان بابەتی نیشتمانپەروەرییە، ئەوەش بریتییە لە سەرنجدان لە لایەنی بەرهەمهێن و گەڕان بە داوی باڕکۆدی کاڵاکەدا، کە ئەوە لە جیهانی ئەمڕۆدا هاووڵاتییان زۆر گرنگی پێدەدەن، چونکە ئەوان هەوڵدەدەن ئەو کاڵا و شمەکانە بکڕن کە بەرهەمی ناوخۆی وڵاتەکەیانە، بەوەش هاوکاردەبن بۆ باشترکردنی باری ئابووریی وڵات و گوزەرانی دەستی کاری خۆماڵی، یان دەیانەوێت بەرهەمی وڵاتانی دۆست بکڕن نەک ئەو وڵاتانەی دژایەتی و ناکۆکییان هەیە لەگەڵ زمان و کەلتور و ئاین و نەریتەکانیان.
تەندروستی
خاڵی دووەم کە تەواوکەری خاڵی یەکەمە لایەنی تەندروستییە چونکە کڕینی جۆر و کوالێتی کاڵاکان پەیوەندیی راستەوخۆی بە تەندروستییەوە هەیە، رەنگە لەم حاڵەتەدا ئەم پرسیارە بێتە پێشەوە، ئێمە کە داهاتمان سنووردارە چۆن دەتوانین کاڵای تەندروست بکڕین؟ لێرەدا پێویستە هاووڵاتی ئەوە بزانێت، بەشێک لەو ماددە خۆراکییانەی کە زیانی زۆریان بۆ تەندروستی هەیە لە هەمان کاتدا کڕینیان پێویستییەکی پلە یەک نییە و نرخیشیان گرانە، لە بەرامبەردا چەندین خواردنی تری سروشتی و بەسوود هەن بۆ تەندروستی خۆی و خێزانی کە دەکرێت وەک جێگرەوەی ئەو خواردنە لەقوتونراو و ئامادەکراوانە کە بڕی چەوری و شەکری زۆریان تیادایە بەکاربهێنرێن. بۆ نموونە زۆرێک لەو خۆراکە لەقوتونراو و بەستوانەی لە بازاڕدا هەن جیاوازییەکی زۆر لە نرخەکانیاندا نییە، بەراورد بە نرخی هەمان کاڵای تازەی ناوخۆیی.
