راپۆرتی/ ئارۆ سامان
ئەندامێکی ئەنجومەنی نوێنەران بۆ کوردستانی نوێ :چەند جارێك بۆ چارەسەرکردنی کێشەکە لە بەغداوە فشارمان كردووە، بەڵام سەری هەڵداتەوە، ئەمجارە گرفتەکە دەبەینە لای وەزیری ناوخۆ و پێویستە دەستبەجێ چارەسەری بۆ بدۆزرێتەوە
قایمقامی خانەقین بۆ کوردستانی نوێ : فرە هێزیی، یەک سایدی رێگەکە، کارنەکردنی ئامێری سۆنەر و بوونی كێشە لە نێوان کارمەندی گومرگ و هێزە سەربازییەكاندا هۆکاری دروستبوونی قەرەباڵغییە لە بازگەی باوە مەحمود
لە ماوەی هەشت مانگی رابردوودا زیاتر لە 10 جار كێشەی قەرەباڵغی و دروستبوونی بەربەست بۆ هاووڵاتیان، لە بازگەی باوە مەحمود لە سنووری شاری خانەقین دروست بووە و تائێستا گرفتەکە وەك خۆی ماوەتەوە.
بەهۆی زۆریی ژمارەی ئەو خاڵە گومرگانەی لە بازگەی باوە مەحمود دانراون، وایکردووە ژمارەیەکی زۆری بارهەڵگر لە هەردوو سایدی رێگەکە بوەستن و ئەوەش قەرەباڵغی لە بازگەکەدا دروست کردووە و بووەتە هۆی ئەستەمکردنی هاتوچۆ لەو بازگەیەوە.
بەرزان كەریم هاووڵاتییەكی دانیشتووی كەلارە، رۆژانە بەهۆی كار و كاسبییەوە لەو بازگەیە هاتوچۆ دەكات بۆ کوردستانی نوێ وتی: رۆژانە بە شێوەیەكی ئێجگار زۆر ئۆتۆمبێلی بارهەڵگر لە بازگەكەدا دەوەستن، دۆخەکە بە بەردەوامی وایە، ئەمەش وایكردووە ئۆتۆمبێلی تایبەت نەتوانێت بە ئاسانی بە بازگەكەدا تێپەڕێت و مەترسی رووداوی هاتوچۆش دروست ببێت.
وتیشی: جگە لەوەی بووەتە مایەی بێزاری، دۆخەکە دەبێتە هۆی بە هەدەرچوونی كاتێكی زۆر، سەرەڕای ئەوەی بەهۆی مەترسی قاچاخیشەوە لێپرسینەوە زۆر دەكرێت.
هاتوچۆ ئەستەم بووە
شیرین مەجید فەرمانبەر لە تەندروستی خانەقین بۆ كوردستانی نوێ وتی: لەبەرئەوەی بەشێكی زۆر دامەزراوی كەلار و ناوچەكانی دیکە لە خانەقین دەوام دەكەن، رۆژانە ژمارەیەكی زۆر ئۆتۆمبێلی فەرمانبەران بەو رێگەیەدا هاتوچۆ دەكەن، كە دەوامیان هەیە و دەبێت سەعات هەشت لەوێ بن، كەچی بەهۆی قەرەباڵغی رێگەكەوە ناتوانین بە ئاسانی بگەین.
وتیشی: بەردەوام مەترسی لەسەر ژیانمانە، لەبەرئەوەی بە سەدان بارهەڵگر وەستاون و دێن و دەچن و كەناری رێگە و ناوەڕاستی رێگە دەگرن.
تەها نەجم چالاكوانی مەدەنی بۆ كوردستانی نوێ وتی: بەپێی بە دواداچوونمان رۆژانە زیاتر لە پێنج هەزار فەرمانبەر لە خانەقینەوە دەچینە كەلار و بەپێچەوانەشەوە لە كەلارەوە دێن بۆ خانەقین دەوام دەكەن، بۆ نموونە لەك ەرتی تەندروستی، پەروەردە، رەگەزنامە و هێزە ئەمنییەكان، جگە لەوەی مەترسی بۆ سەر ژیانیان دروست دەبێت، هاوكات لە دەوامیش دوا دەكەون.
لە چاوەڕوانیدا دەمێننەوە
قەحتان مەحمود كارمەندی تەندروستییە دەڵێت: زۆرجار گرفت بۆ نەخۆش و هاووڵاتیان دروست دەبێت و ژیانیان دەكەوێتە مەترسییەوە، بە تایبەت کاتێک نەخۆشێك ئاڕاستەی كەلار یان سلێمانی دەكرێت چەندین سەعات لەو بازگەیەدا دەمێنێتەوە.
وتیشی: رۆژی وا هەیە زیاتر لە چوار سەعات چاوەڕوان دەبین، ئەمانە كێشەی گەورەن و نابێت بەم شێوەیە بمێنێتەوە.
بازگەیە، نەك خاڵی سنووری
خاوەن باخ و جووتیاران و خەڵكی گوندەكانی ئەو سنوورە، گلەیی دەكەن، کە بەهۆی قەرەباڵغی و وەستانی زۆری ئۆتۆمبێلەوە كێشە بۆ هاتوچۆی ئەوانیش دروست بووە و دەڵێن: جاری واهەیە ناتوانین لە دەرگای باخەكان بێینە دەرەوە، لەبەرئەوەی ئۆتۆمبێلە بارهەڵگرەكان رێگەیان گرتووە، نایەڵن هاتوچۆ بكەین، ئەمەش كاروباری پەكخستوین.
سۆزان مەنسور ئەندامی ئەنجومەنی نوێنەرانی عیراق لە بارەی كێشەی بازگەی باوە مەحمود بە کوردستانی نوێی راگەیاند: چەند جارێك ئەم كێشەیە دروست بووە، هەوڵمانداوە چارەسەری بكەین، بەڵام كاتیی بووە و دواتر بەهۆی هەندێك بەرژەوەندییەوە دروست بووەتەوە.
وتیشی: بە لایەنە بەرپرسەكان و بەرپرسی گشت بازگەكانی عیراقمان وتووە، ئەمە بازگەی مەدەنییە واتە هاووڵاتیان پێیدا هاتوچۆ دەكەن، نەك خاڵێكی سنووریی، كە گومرگی تێدا دانراوە و بەهۆیەوە قەرەباڵغی دروست بووە، ئەوەش بووەتە هۆی ئاستەنگیی هاتوچۆی هاووڵاتیان، لەبەرئەوەی ئەو رێگەیە بەردەوام جوڵەی تێدایە.
زیاتر لە حەوت هێزی ئەمنی لە بازگەكەدایە
جواد فەیزوڵڵا قایمقامی قەزای خانەقین بە كوردستانی نوێی راگەیاند: چەند هۆكارێك هەیە بۆ دروست بوونی كێشەكە، یەکێک لەوانە فرە هێزیی كە زیاتر لە حەوت هێز لەو بازگەیەدایە، لە کاتێکدا بازگەیەكی مەدەنییە و تەنها بۆ پشكنینی هاووڵاتیانە، هەروەها رێگەكە یەك سایدە، ئامێری سۆنەر كاری تێدا ناكات، جگە لەوەی كێشە لە نێوان کارمەندانی گومرگ و هێزە سەربازییەكاندا هەیە، ئەمە كارەكەی بۆ سەخت كردوین.
تەواوی ئەو بارهەڵگرانەی بارەكانیان لە خاڵی سنوریی پەروێزخان یان خاڵە سنورییەکانی دیکەوە بەرەو باشوور دەبەن، بەشی زۆریان بە بازگەی باوە مەحموددا تێپەڕدەبن ئەمەش قەرەباڵغی زۆری دروستكردووە.
سۆزان مەنسور دەڵێت: چەند جارێك بۆ چارەسەرکردنی کێشەکە لە بەغداوە فشارمان كردووە، بەڵام سەریهەڵداتەوە، ئەمجارە گرفتەکە دەبەینە لای وەزیری ناوخۆ و پێویستە دەستبەجێ چارەسەری بۆ بدۆزرێتەوە.
وتیشی: داوای دانانی ئامێری سۆنەر دەكەین، لەبەرئەوەی بەشێكی ئەو كێشانەی دروست دەبن نەبوونی ئامێری سۆنەر، یان بۆ هەبوون و كارپێنەكردنی دەگەڕێتەوە.
هاوکات قایمقامی خانەقین دەڵێت: لە سەردانەكەی پارێزگاری دیالە بۆ خانەقین، سەردانی بازگەكەی كردووە و داوامان لێکرد ئەو كێشەیە چارەسەر بكات، بەڵێنی چارەسەری پێداین بە دوو سایدکردنی رێگەکە و قسەکردن لەگەڵ هێزە ئەمنییەكان و گومرگ کە ئاسانکاری بۆ هاووڵاتیان بکەن.
وتیشی: ژیانی هاووڵاتیان لە پێشەوەی هەموو شتێكە، لەسەر هێڵ دەبین بۆ ئەوەی بە هەر شێوەیەك بێت چارەسەری بكەین و مەترسی لەسەر ژیانی ئەو هاووڵاتیانە نەهێڵین کە بەو بازگەیەدا هاتوچۆ دەکەن.
