ماوەی 10 ساڵە پرۆژەیەکی تەندروستی بە ناتەواوی بەجێهێڵراوە

تەندروستیی هەڵەبجە: لەدوایی چەندین سكاڵا و داواكاریی پرۆژەی نەخۆشخانەی بەركەوتووانی كیمیایی كارەكانی تەواو نەكراوە

12:03 - 2025-03-03
ڕاپۆرت
75 جار خوێندراوەتەوە

بەڕێوەبەری گشتیی تەندروستی هەڵەبجە رایدەگەیەنێت: لە دوای چەندین نووسراو بۆ وەزارەتی تەندروستی، ماوەی 10 ساڵە كۆمپانیایەك كارەكانی پرۆژەی نەخۆشخانەی بەركەوتووانی چەكی كیمیایی بە تەواونەكراوی بەجێهیشتووە .
لەوبارەیەوە ئازاد مستەفا بەڕێوەبەری گشتیی تەندروستیی هەڵەبجە بە كوردستانی نوێ – ی راگەیاند: لەدوای 10 ساڵ چاوەڕوانی و چەندین سكاڵای یاسایی  و داواكاریی بۆ وەزیری تەندروستی، كۆمپانیای زاگرۆس كارەكانی بەتەواونەكراوی لە نەخۆشخانەی بەركەوتوانی چەكی كیمیایی لە هەڵەبجە بەجێهێشتووە.
هەروەها وتی: كارە تەواونەكراوەكانی پرۆژەکە بریتییە لە كەمیی ئامێرە پزیشكییەكان و بەشی میكانیكی و ئاو و ئاوەڕۆ و كێشەی سیستمی ساردی و گەرمی لە نەخۆشخانەكەدا،  ئەمەش كێشەی  بۆ بەشی نەشتەرگەری و چارەخوازان دروستكردووە.

جەختیشیكردەوە لەوەی كە ئەو كۆمپانیایە بۆ تەواوكردنی كارەكانی  داوای دوو ملیۆن دۆلار لە حكومەت دەكات،  بەڵام بەداخەوە بەهۆی ئەوەی پشگیریی  دەكرێت، وەڵامی داواكاری و نووسراوەكان ناداتەوە و هیچ لێكۆڵینەوەیەكی یاساییشی بەرامبەر نەكراوە، وەزارەتیش لەو رووەوە وەك پێویست وەڵامیان نەداوینەتەوە.
روونیشكردەوە كە نەخۆشخانەی بەركەوتووانی چەكی كیمیایی  لە نەخۆشخانەیەکی 20 قەرەوێڵەیی پێكهاتووە کە لە ساڵی 2009 دا حكومەتی هەرێم بەردی بناغەی داناوە، لە ساڵی 2014دا، بەتەواونەكراوی بەڕووی چارەخوازاندا کرایەوە.

بابەتە پەیوەندیدارەکان