سازدانی: نەرمین عوسمان محەمەد
دیمەن عەبدوڵڵا بۆ کوردستانی نوێ : بتوانرێت زیاتر ژنان بهێنرێنە پێشەوە و بەشداری لە ژیانی سیاسی و بڕیاری حکومی و پێگە ئەهلییەکاندا بکەن
لەماوەی رابردوودا بە مەبەستی بەرزکردنەوەی ئاستی بەشداریی ژنان لە کایەکانی دەسەڵاتدا، رێکخراوی (لێکۆڵەر بۆ سەروەریی یاسا) خولێکی بۆ ژنان کردەوە، یەکێک لەو بابەتانەی لەو خولەدا خوێندرا بابەتی رۆڵی ژنان بوو لە دەسەڵاتی جێبەجێکردندا. سەبارەت بەم بابەتە دیمەن عەبدوڵڵای نووسەر و لێکۆڵەر بۆ دیجیتاڵ میدیای کوردستانی نوێ وتی: ئەم خولە گرنگییەکی یەکجار زۆری هەیە بۆ ئەوەی بزانین چۆن وابکەین رۆڵی ژنان لە هەموو کایەکاندا زیاد بکەین و بەشداریی بە ژنان بکەین، بەتایبەتی زیادکردنیان لە پەرلەماندا، هاوکات زیادکردنی رۆڵی ژنان لە ناوەندەکانی بڕیارداندا بۆ نموونە ئەگەر بێت و ئێمە داتایەک کۆبکەینەوە لەسەر ژمارەی ئەو ژنانەی بەڕێوەبەرن و خاوەنی پۆستی بڕیاردان و دەسەڵاتن، هەروەها ئایا ئەو بڕیارانەی ژن جێبەجێی دەکات بڕیاری خودی خۆیانە یاخود بڕیاری سەرووی خۆیانە، بۆیە لەم خولەدا کۆمەڵێک بابەتی باش باسکران کە لە رێگەیەوە بتوانرێت زیاتر ژنان بهێنرێنە پێشەوە و بتوانن زیاتر بەشداری لە ژیانی سیاسیی و بڕیاری حکومیی و پێگە ئەهلییەکاندا بکەن، تا بتوانن لە هەموو ناوەندەکاندا بە شێوازێکی گشتی بوونیان هەبێت و لە هەموو ناوەندەکاندا خاوەن دەسەڵاتی باڵا بن.
