سەركردەی نەمر، خەلیل نیعمەت دۆسكی، لە دایكبووی ساڵی 1954ی بنەماڵەیەكی نیشتمانپەروەری شاری دهۆكە، قۆناغەكانی خوێندنی سەرەتایی و ناوەندی و ئامادەیی لەو شارە تەواوكردووە، ساڵی 1975 سەركەوتووانە كۆلێژی پۆلیسی عیراقی تەواوكردووە و بۆتە ئەفسەر، ساڵی 1978 چۆتە كۆڕی خەباتەوە لە رێكخستنەكانی یەكێتیی نیشتمانیی كوردستاندا.
ساڵی 1985پەیوەندیی كردووە بەشۆڕشی نوێوە و بووە بە پێشمەرگە لەبارەگای سەركردایەتی ی.ن.ك و كراوەتە ئەندامی مەكتەبی عەسكەری.
لە چەندین نەبەرد و داستاندا دژی سوپای رژێمی بەعسی داگیركەر بەشداربووە، بەتایبەت لە شاڵاوەكانی ئەنفال بۆسەر دۆڵی جافایەتی و بارەگاكانی سەركردایەتیی شۆڕش و یەكێتیی نیشتمانیی كوردستان.
هەڤاڵ خەلیل دۆسكی، لەخەباتی شاخدا هەر زوو توانی جێگەی خۆی بكاتەوە و ببێتە یەكێك لەو تێكۆشەرانەی كەبۆ ئازادی گەلەكەی، ژیانی تایبەتی خۆی بكاتە قوربانی، ئەو بۆ گەلەكەی و بۆ یەكێتییەكەی دڵسۆزێكی راستەقینەبوو، تا دواهەناسەشی سپارد، هەربە دڵسۆزی و بەگیانی پێشمەرگەیی مایەوە.
ئەو پێشمەرگەیە، سەركردەیەكی قارەمان و فەرماندەیەكی ئازاو بەتواناو بوو، لە راپەڕینی ساڵی 1991دا، كاریگەرانە بەشداریكردووە و لێپرسراوی سەربازیی ناوچەی بادینان بووە، رۆڵی ئەو سەركردەیە لە راپەڕینی ئەو ناوچەیەدا، دیارو بەرچاو بوو.
ساڵی 1993 لە دوای دامەزراندنی حكومەتی هەرێمی كوردستاندا، هەڤاڵ خەلیل دۆسكی كرایە لێپرسراوی ئاسایشی گشتیی پارێزگای دهۆك، لەوبوارەشدا ئەركەكانی بەسەركەوتوویی جێبەجێ دەكرد و نموونەیەك بوو لەسەركەوتنی كار و ئەركی نوێ، پاشان تا مانگی یەكی ساڵی 1994 لەوپۆستە بەردەوام بوو، هەروەها ئەندامی مەڵبەندی چواری یەكێتیی نیشتمانیی كوردستانیش بوو لە بادینان.
پاش ماوەیەك كرایە ئەندامی فەرماندەیی گشتی هێزی پێشمەرگەی كوردستان و لەمانگی 7/1996 پلەی سەربازیی بەرزكرایەوە بۆ لیوا.
بەو زانستە سەربازییەی هەیبوو، لەهەموو كەس زیاتر پەی بەوە دەبرد كەدەبێت هێزی پێشمەرگە لەسوپایەكی یەكگرتوودا رێكبخرێت و ببێتە سوپای كوردستان، بەردەوامیش لەهەوڵی ئەوەدا بوو هێزی پێشمەرگەی كوردستان بكاتە هێزێكی نیزامی و لەبنكەكانی مەشقدا، سەرباز و جەنگاوەری بەدیسپلین بۆ پارێزگاری لەخاكی كوردستان پەروەردە بكات.
ساڵی 2001 لە كۆنگرەی دووەمی یەكێتیی نیشتمانیی كوردستاندا بە ئەندامی سەركردایەتی هەڵبژێردرا، هەمان كات پۆستی وەزیری گواستنەوە و گەیاندنی لە حكومەتی هەرێمی كوردستان (ئیدارەی پێشووی سلێمانی) پێدراوە.
بەڵام بەداخەوە، دوای گرفتاربوونی بەنەخۆشییەكی سەخت، سەعات 4ی ئێوارەی رۆژی 29/2/2004 لەنەخۆشخانەی ئازادیی شاری دهۆك كۆچی دوایی كرد و سەعات 10ی سەرلەبەیانی رۆژی 1/3/2004یش لەڕێوڕەسمێكی شایستەدا تەرمەكەی لەنەخۆشخانەی ئازادیی شاری دهۆكەوە بەرەو گۆڕستانی (شاخكێ) بەڕێكراو لەوێ بەخاك سپێردرا.
دواپلەشی ئەندامی سەركردایەتی یەكێتیی نیشتمانیی كوردستان و وەزیری گواستنەوەو گەیاندنی حكومەتی هەرێمی كوردستان بوو.
