هەمیشە دەم بەخەندە و قسەخۆش بوو، هەمیشەشە نوكتە و بەسەرهاتی خۆشی لەسەر زار بوو، ئەو لاوێكی جوان و پوخت و پۆشتە بوو، كراوە و دۆستی هەموو كەس بوو، خۆنەویست و سادە بوو، پێشمەرگەیەكی رەوشتبەرز و هێمن بوو.
لە ئەركی پێشمەرگانەدا كامڵ و بە دیسپلین و گوێڕایەڵ و بەدیقەت بوو، لە هەڵمەت و هێرشبردنیشدا بۆسەر دوژمن، نەترس و چاوقایم بوو، لەتەمەنی پێشمەرگایەتیدا لە زۆربەی داستان و هێرشەكاندا لە دەستەی هێرشدابووە.
ئەمانە، خەسڵەت و پێناسەی شەهید (فوئاد مشاری)ە، هاوڕیێانی گێڕایانەوە لە دوا شەڕدا یەكەم پێشمەرگەبوو كە گەیشتە ناو ئەو رەبایەی بۆیان دەستنیشانكرابوو، هەر وەك ئەوەی گرنگی بە گوللە و ئاگری چەكی دوژمن نەدات، ئاوابوو، لەناو رەبایەكە چەندین خۆفرۆش كەوتنە بەر سزای گەل، سەركەوتنەكە تۆماركرا و دوژمن شكا، نرخی سەركەوتنەكەش، خوێنی فوئاد مشاری بوو، رۆحی شادبێت.
ژیاننامەكەی
شەهید فوئاد قادر ئیسماعیل ئیبراهیم ناسراو بە فوئاد مشاری، لەدایكبووی ساڵی 1967ی (گوندی مشار)ی قەزای مەخمورە و تا پۆلی یەكەمی ناوەندیی خوێندووە.
ساڵی 1984 پەیوەندیی كردووە بە رێكخستنەكانی كۆمەڵەی رەنجدەرانی كوردستانەوە و ساڵی 1985 بووە بە پێشمەرگەوە لە كەرتی 1ی تیپی 87ی قەرەچوغ.
ساڵی 1987 كراوەتە فەرماندەی مەفرەزە لە كەرتی 7ی هەمان تیپ.
شەهید فوئاد پێشمەرگەیەكی ئازا و نەترس بوو، لە ژیانی پێشمەرگایەتیدا بەشداریی دەیان داستان و نەبەردی و چالاكی كردووە، وەك: گرتنی قاتعی ئەبوجەعفەر مەنسور و گرتنی شارۆچكەی تەقتەق، شەڕەكانی شێخ شەروان، تەللخێم و داستانی رزگاری.
یەكێك بووە لە پێشمەرگەكانی ئەو هێزەی كە لەگەڵ شەهید ئازاد هەورامی و لە چوارچێوەی پێكهاتنەوەی یەكێتی و پارتی، لە ساڵی 1987دا چووە بادینان، ماوەی ساڵێك لەوێ مایەوە و بەشداریی زۆربەی چالاكییەكانی ئەوێی كردووە.
هەر پاش گەڕانەوەی هێزەكەیان، بەشداریی داستانی دۆڵی بالیسانیان كرد و رۆژی 22/6/1988 لەكاتی گرتنی رەبایەیەك لەسەر چیای بێترخێن، شەهیدكرا و بووە دووەم شەهیدی خێزانەكەی.
