لالیش ئۆسێف، نووسەر و پیشەگەرێكی دەستڕەنگیی دانیشتووی شاری بەدلیسی باكوری كوردستانە، ماوەی چەند ساڵێكە سەرقاڵی دروستكردنی بووكی دەستییە بە قوماشی جۆراوجۆری ناوازە و كارەكانی بە شێوەی ئۆنلاین بڵاودەكاتەوە، هاوكات پیشەكەی بووەتە سەرچاوەی داهاتی خێزانەكەیان.
لالیش ئۆسێف بە كوردستانی نوێی وت: جگە لە كارەكەم، مامۆستای مێژووی هونەریم و ماوەیەك كارم لەسەر جلوبەرگی ژنان كردووە، لە ماوەی پێنج ساڵی رابردوودا خەریكی پڕۆژەیەك بووم بۆ دروستكردنی بووكی دەستكرد بە مەبەستی كاری هونەری و بە دەستهێنانی داهات و هەر بووكێك بە شێوەیەكی جیاواز دروست دەكەم و ئامانجم سەرنجراكێشانی خەڵكە بۆ كارەكانم.
وتیشی: تا ئێستا زیاتر لە 400 بووكی لە قوماش دروستكراوم هەیە و لەرێگەی ئۆنڵاین ریكلامیان بۆ دەكەم و دەیانفرۆشم، دڵخۆشم بەوەی خواستێكی زۆر لەسەر بووكی دەستيی هەیە، دڵخۆشم بەوەی لە خێزانێكدا گەورە بووم خاوەن ژنی لێهاتوو و بەهرەمەندە، هەر بووكێك تێبینی و یادەوەری و چیرۆكێكی جیاوازی هەیە، دەمەوێت چیرۆكەكانی نەتەوەی كورد زیندوو بكەمەوە، ژنانی كورد خاوەن رابردوویەكی دەوڵەمەندن لە بواری هونەريی كاری دەستڕەنگینی و شوێن پەنجەیان لە مێژوودا دیارە.
ئەیاز هەركی
