كتێبێك بۆ شەهیدانی لە سێدارەدراو

ئاوات كۆكەیی

سەروەرانی زیندانی موسڵ و بەڵگەنامەكان، كتێبی ئەم جارەی پڕۆژەی دیاریی ئازادی – زنجیرە(22)ە و وەك هەمیشەش ئەمیرە محەمەد كۆی كردۆتەوە و ئامادەی كردووە، ژیاننامە و بەڵگەی زیاتر لە 170 شەهیدی لەخۆگرتووە و 257 لاپەڕەیە. 
كتێبەكە، بە ناوەكەیدا دیارە دەربارەی شەهیدانی لە سێدارەدراوی دەستی رژێمی بەعسە لە قەسابخانەكەی موسڵ، شەهیدەكان بەتەنیا خەڵكی ناچە و شارێك نین، خەڵكی هەموو ناوچەكانی كوردستانی تێدایە.
ئەم بەرهەمەی خاتوو ئەمیرە لە چەند بڕگەیەك پێكهاتووە، بڕگەكانیش نووسین و وێنە و بەڵگەنامەن، نووسینەكان پوختەیەكی زۆر كورتی ژیاننامەی شەهیدەكانن، وێنەكانیش هی شەهیدەكان و كەسوكاریان و هی گۆڕ و مەزار و بۆنە جیاوازەكانن، بەڵگەنامەكانیش جۆراوجۆرن، نووسراوی دوایین مواجە (مواجهە)ی دەزگای بەدناوی بەعسە بۆ كەسوكاری گیراوەكان تا بۆ دواجار و بەر لە لەسێدارەدانیان، سەردانی كوڕەكانیان بكەن، هەروەها كۆپی (رۆژنامەی عیراق)ی زمانحاڵی بەعسی داگیركەرە كە دەربارەی شەهیدەكان بەسووكایەتییەوە دەدوێت و بە تێكدەر ناویان دەبات، بەڵگەنامەی مردن و زۆری دیكەش.
دێڕی وا لە بەڵگەكاندا هەیە، كورد واتەنی دڵ دەكات بەئاو، وێنەكانیش هەر خەم و ئازار نین، بەڵكو هێز و ئیرادەی كەسوكاری شەهیدان پیشان دەدەن، بابەتی سەرنجڕاكێش و گرنگی لەخۆ گرتووە، لەوانە: وێنە هەیە كەسوكارەكەی لەسەر گۆڕی كوڕە لەسێدارە دراوەكەیان لە موسڵ، بە نهێنی ئاهەنگی نەورۆز دەگێڕن، نهێنی واتا خۆیان بازنەیەكیان بە چواردەوری گۆڕی شەهیدەكەیاندا كێشاوە و بە ئامێری تەسجیل (ریكۆردەر) گوێ لە سرودی نەورۆز و سرودی دیكەی شۆڕشگێڕانە دەگرن و لەگەڵیشیدا چەپڵە و هەلهەلە و پێكەنین و كەشێكی سەیرانئامێزیان رەخساندووە، ئەوەش لەسەر داوای شەهیدكەیان بووە كە پێشتر پێی وتوون خەفەتم بۆ نەخۆن و لەبری ئەوە ئاهەنگم بۆ ساز بكەن.
بەشێكی بەرچاوی كتێبەش تەرخان كراوە بۆ نمایشكردنی وێنەی مەراسیمی هێنانەوەی روفاتی شـــەهیدەكان، ئــــەو مەراسیمەی كە هەر لە سەرەتای رووخانی رژێمی بەعسدا سازكرا و تیایدا كەسوكاری شەهیدەكان بەهاوكاریی دەزگای شەهیدان و دەزگاكانی دیكەی یەكێتیی نیشتمانیی كوردستان، روفاتی شەهیدەكانیان لە زیندانی موسڵەوە هێنایەوە بۆ هەرێمی كوردستان، لە رۆژی 23/6/2003 گەیشتنە سلێمانی و لە گۆڕستانی شەهیدانی شۆڕشی نوێ، بەخاك سپێردرانەوە.
دیسان وێنەكانی ئەو مەراسیمەش پڕپڕن لە چیرۆكی خەم و مەینەتییەكانی ئەم گەلە، كاتێك گۆڕی شەهیدەكان هەڵدەدەنەوە و رووفاتەكانیان لەناو خاك و خۆڵی غەریبیدا دەردەكەون، دەرونی مرۆڤ ئازاری پێدەگات، دەردەكەوێت بە هاكەزایی و بێ گرنگی پێدان، كراون بە ژێر خۆڵەوە.
لێرەدا پێویستە ئەوە بڵێم: رۆژگاری ئەمڕۆمان بەهەر بارێكدا وەرچەرخابێت و  ژیان و گوزەرانی خەڵك چەند لە ئاستێكی خراپدا بێت، نابێت ئەو مێژووەمان بیربەرێتەوە كە بەشێكی كەمی لەم كتێبەدا تۆماركراوە، یان ئەو وێنانەمان لەبەرچاو تەڵخ و بێ بەها بكەن كە دیسان بەشێكی كەمیان لەم كتێبەدا، خراونەتە روو.
ئەوە مێژووی گەلێكی داگیركراوە، تۆماری سەروەریی ئەو رۆڵە تێكۆشەرانەیە كە بۆ سەربەستیی كورد و بۆ هێنانەكایەی دادپەروەریی، بەدرێژایی چەندین مانگ لەژێر ئەشكەنجەدابوون و دوای ئەوەش، لە ژێر سێدارەی بەعسی دڕندەدا، گیانی خۆیان كردە فیدای ئێمە و ئێوە و خاكی كوردستان.
ماوەتەوە بڵێم: ئەگەرچی كتێبەكە بەدەرنییە لە كەموكووڕیی، بەڵام تا بڵێی بەهاو بایەخی تایبەتی هەیە و ئەمیرەخانی نووسەر و ئامادەكاریش، شایستەی دەستخۆشی و پێزانینە بۆ ئەم كارە گرنگەی.