حوسنا مه‌حمود هه‌ورامی، كچه گه‌نجێكی شاری هه‌ڵه‌بجه‌یه، به‌رهه‌مه‌كانی له كه‌ره‌سته و پاشماوه فڕێدراوه‌كانه‌وه دروست دەكات و دووباره به‌كاريانده‌هێنێته‌وه.
حوسنا هه‌ورامی به دوالاپه‌ڕه‌ی وت: خاوه‌نی چوار پێشانگه‌ی تایبه‌ت به خۆمم، له بواری هونه‌ری ریسایكلین، ئامانجم له كردنه‌وه‌ی ئه‌م گه‌له‌رییه ئه‌وه‌یه كه به كردار پیشانی خه‌ڵكی بده‌م، تا ببنه دۆستی ژینگه و فێریان بكه‌م چۆن ده‌توانن له‌و كه‌ره‌سته فڕێدراوانه جارێكی تر شت دروست بكه‌نه‌وه، له‌بری ئه‌وه‌ی فڕێی بده‌نه ژینگه و دواجار ژینگه پیس بكەن.
وتیشی: گه‌له‌رییه‌كه‌م بووه‌ته شوێنێكی فێركاريی بۆ هۆشیاركردنه‌وه‌ی ته‌مه‌نه جیاوازه‌كان كه چۆن بتوانن وه‌ك تاك هۆشیار بن و ببنه هاوڕێی ژینگه، چونكه ژینگه موڵكی هه‌موومانه، ئێستا ئه‌مانه‌ته له‌ده‌ست ئێمه‌دا، با به پاراستنی، زه‌وییه‌كی پاك و ژینگه‌یه‌كی خاوێن به‌دیاری ببه‌خشین به نه‌وه‌كانی داهاتوومان.
محه‌مه‌د تۆفیق نه‌ورۆڵی
