وەفدێكی مەڵبەندی 8ی خانەقیی ی.ن.ک بە سەرۆكایەتی شێركۆ میروەیس لێپرسراوی مەڵبەند سەردانی شاری بەعقوبەیان كرد و لەگەڵ پارێزگار و سەرۆكی ئەنجومەنی پارێزگای دیالە كۆبوونەوە.
هەماهەنگی و پێكەوەیی لەپێناوی خزمەتی زیاتر
وێستگەی یەكەمی سەردانەكە كۆبونەوەبوو لەگەڵ پارێزگاری دیالە، وێڕای پیرۆزبایی دەستبەكاربوونی عەدنان شەمەری وەك پارێزگار، چەندین بابەتی گرنگ تاوتوێكران، لەو بارەیەوەشەوە شێركۆ میروەیس وتی: پاراستنی ژیانی پێكەوەیی و خزمەتكردنی ئاوەدانی خانەقی لەپێشەوەیە، سەردانمان بۆ لای پارێزگار و هەر بەرپرسێكی سنوورەكە لەپێناوی هەماهەنگی و كاری پێكەوەییە، چونكە بڕوامان وایە تەنها كاركردن بەو مەبەستە دەتوانێت بەرەو پێشەوەمان بەرێت.
وتیشی: لەسەر تەواوی پرسەكان لەگەڵ ئیدارەی پارێزگای دیالە كۆكین، جەختمان لە لەیەكترتێگەیشتنی زیاتر كردەوە و چەند پرسێكی گرنگ كە لەرابردوو و ئێستادا پێویستیان بەچارەسەر بووە، باسمان لێوەكرد و بڕیارماندا ئەم جۆرە سەردان و كۆبوونەوانە لەپێناوی خزمەتكردنی خەڵك و ناوچەكە و خانەقیدا بەردەوام بێت.
خەمی یەكێتی خەمی ئاوەدانیی زیاترە
عەدنان شەمەری پارێزگاری دیالە بۆ كوردستانی نوێی خانەقی وتی: تێگەیشتنی زیاتر هەیە لەنێوان ئیدارە و برایانمان لە یەكێتیی نیشتمانیی كوردستان، بەروونی جەختیان لە گەشەپێدان و ئاوەدانیی زیاتری تەواوی ناوچەكانی دیالە و بەتایبەتی خانەقی كردەوە، ئەمە خاڵێكی زۆر گرنگە، نیەتی پێكەوەیی و هەنگاونانی زیاتر گرنگە، بۆیە لە تەواوی خاڵەكاندا لەگەڵ یەكتریدا كۆكین.
باسی لەوەشكرد: پێكهاتەی كورد پێكهێنەرێكی سەرەكیی پارێزگاكەیە، تێبینی و راوبۆچوونەكانیان، پێشنیازەكانیان گرنگن و كاریگەریی گرنگیان دەبێت لەسەر پرۆژە و پلانەكانمان لە پارێزگاكە و لەداهاتووشدا هەنگاوی گەورەترمان دەبێت لەگەڵ یەكتریدا.
خانەقی پێویستی بەپرۆژەیە
سۆزان مەنسور ئەندامی ئەنجومەنی نوێنەرانی عیـــــراق -یش وتی: لە كۆبونەوەكەماندا جەختمان كردەوە لەوەی کە خانەقی پێویستی بە پرۆژەیە، ناكرێت پرۆژەی دروستكردنی نەخۆشخانە لە زۆربەی شارەكانی دیالەدا بچێتە بواری جێبەجێكردنەوە، بەڵام خانەقی كە بینای نەخۆشخانەكەی دەگەڕێتەوە بۆ نزیكەی 60 بۆ 65 ساڵ پێش ئێستا، نەخۆشخانەی تێدا دروست نەكرێت.
وتیشی: كێشەكە بەس لە كەرتی تەندروستیدا نییە، بەڵكو لەتەواوی سێكتەرەكانی وەک ئاوی خواردنەوە، رێگەوبان، كارەبا و زۆر شتی تردا هەیە، ئەوەشمان بەڕوونی بە جەنابی پارێزگار وت کە دەكرێت بەشێك لە پرۆژەكانی دیالە بهێنرێنە خانەقی و ئاوەدانیی زیاتر شارەكە بگرێتەوە.
نۆ پرۆژە بۆ خانەقی
هەر لەوبارەیەشەوە ئەندازیار جواد فەیزوڵڵا قایمقامی قەزای خانەقی جەختیكردەوە: وەك ئیدارەی خانەقی نۆ پرۆژەمان خستە بەردەم پارێزگاری دیالە، كە لەكۆنكرێتكردنی چەندین گەڕەكی شارەكە پێكهاتووە، دەستبەجێ ئیمزای لەسەر كردن و پێیوتین: لەسەر داهاتە جیاوازەكانی پارێزگاكە جێبەجێیان دەكەین.
باسیش لەوە كرد: ئەم جۆرە كۆبوونەوانە وامان لێدەكات بتوانین زووتر پەیامی روونی خۆمان بگەیەنین و پێویستییەكانی شارەكە و هەنگاوەكانی ئاوەدانی خێراتر جیبەجێ بكەین.
كۆمیتەكانی یەكێتی بكرێنەوە
لەسەر ئاستی حزبی-ش، هۆشیار ئیسماعیل كارگێڕی مەڵبەندی 8ی خانەقی یەكێتی، رایگەیاند کە داواكارییەكیان خستووەتە بەردەم پارێزگاری دیالە تا سەرجەم ئەو كۆمیتانەی کە لە سنووری ناحیەكانی سەعدیە و قەرەتەپە و جەلەولا، داخراون، لایەنە بەرپرسەكان رابسپێردرێن كە بكرێنەوە و دەست بەجێ داواكەی قبووڵكردین و بەپێی هەنگاوی پێویست دەبێت بكرێنەوە.
ئاماژەشی بەوە دا کە هەردوولا ئەم جۆرە سەردان و كۆبوونەوانەیان بە گرنگ زانی تا بتوانرێت چاوكراوانەتر كاربكرێت، ئەوكاتە دەرفەتی باشتر دەڕەخسێت بۆ تێگەیشتن لە یەکتری.
