ئەیوب عەلی، بۆ کوردستانی نوێ :هیچ پیشەیەكی ترم نییە، جگە لە كاری ئاواز دانان و تێكست نووسین

ئەیوب عەلی هونەرمەند، تا ئێستا خاوەنی 7 ئەلبومی گۆرانییە، لەگەڵ چەند گۆرانییەكی سینگڵ، بەڵام بۆ داهاتوو نزیكەی 16 بەرهەمی ئامادەكردووە.
ئەیوب عەلی بە دوالاپەڕەی راگەیاند: لە ئێستادا هیچ پیشەیەكی ترم نییە، جگە لە كاری ئاواز دانان و تێكست نووسین، هاوكات سەرقاڵی میوزیك و ژەنینی ئامێری سازم، تا ئێستا خاوەنی 7 ئەلبومی گۆرانیم لەگەڵ چەند گۆرانییەكی سینگڵ كە لە كاتی خۆیدا لە كوردستان تۆمارم كردووە، نزیكەی 16 گۆرانیم وەك تێكست و ئاواز ئامادەن، بەڵام دەستم نەكردووە بە تۆماركردنیان، بە زاراوەی سۆرانی و كرمانجی، بیرۆكەی چەند پرۆژەیەكی دیكەشم هەیە لەگەڵ هونەرمەندانی وڵاتانی دیكە، بەڵام تا ئێستا نەچوونەتە قۆناغی جێبەجێكردن و تۆماركردنەوە.
وتیشی: ساڵانێكی زۆرە سەرقاڵی كاری هونەریيم، ستایلی بەرهەمەكانم كە سەرەتا پێی ناسرام (ئەرابێسك) بوو، بەڵام ئێستا چەندین ستایلی جیاواز هەیە كە حەز دەكەم كاری پێبكەم، حەزدەكەم بە میوزيكی رەسەنی كوردی خزمەت بە هونەری كوردی بكەم لە چەندین فێستیڤاڵ تەنها ميوزیكی كوردی پێشكەش دەكەین، بەڵام وەك ستایل بە ئەرابێسك ناسراوم، گۆرانییەكانم شیرینن وەك چەپكە گوڵێكن لەلام، لە كوردستان زۆر شت دەتوانرێ بكرێت بۆ پێشخستنی بوارەكانی هونەر نەك تەنها ميوزیك، دەتوانرێ باشتر خزمەتی هونەر بكرێ بە پشتگیریكردنی هونەرمەندان و رەخساندنی دەرفەت بۆ هەر كەسێك لە بوارەكەی خۆی بتوانرێ بنێردرێتە دەرەوەی كوردستان بۆ بینینی خول، گۆرانی فۆلكلۆری و سەردەمیانە گرنگن، ئامانجم بەردەوامیمە، هەروەها خەونی گەورەم هەیە هیوادارم بیهێنمە دی بۆ خزمەتكردن بە هونەری كوردی، چونكە ميوزیك خەونی منداڵییمە، هونەر لە رۆح و خوێنمە واتە هەناسە و هەموو ژیانمە هەر بەردەوام دەبم و واز ناهێنم.
دیانا ئەحمەد