لە قەزای ئامێدی دوو ژن كارگه‌یەکی تا‌عینیان دامەزراندووە و رۆژانە خواستێكی زۆری کڕیاران لەسەر به‌رهه‌مه‌كانیانە، له‌وباره‌یه‌وه بێریڤان ته‌ها، به‌ڕێوه‌به‌ری کارگەکە بە کوردستانی نوێی راگەیاند: ماوەی چوار ساڵە لەگەڵ ژنێكی تری خێزانەکەمان رۆژانە کار لەسەر دروستكردنی تاعین دەکەین و ئەم کارەمان لە خێزانەکەمانەوە بۆ ماوەتەوە، هه‌رچه‌نده كارگه‌ی ئاشی تا‌عینی فۆلكلۆر لە ساڵی 1996 ەوە لەلایەن خێزانەکەمانەوە دامەزراوە، بەڵام چەند ساڵێکە ئێمه بەڕێوەی دەبەین.
وتیشی: تاعین و چەندین جۆری دیكه‌ی بەرهەمی خۆماڵیی و کورده‌واریی به‌ده‌ستی خۆمان دروست ده‌كه‌ین، هەروەها بینای كارگه‌كه‌مان لەسه‌ر شێوازی فۆلكلۆری دروستکراوە و ده‌كه‌وێته‌وه هاوینه‌هەواری سۆلاڤ، هاوکات نانی بەیانیان لێرە بەخۆڕاییە و پێشکەشی گەشتیاران و کڕیارانی دەکەین. بێریڤان ته‌ها دەڵێت: پێویستە ژنان زیاتر پشت بە تواناکانی خۆیان ببەستن و ئاینده‌ی خۆیان زامن بکەن و چاویان لە ده‌ستی کەس نەبێت بەخێویان بکات.
ئەو ژنە باسی لەوەش کرد کونجییه‌كه‌ی ئەوان خۆماڵییه و هی جووتیارانی سنووری ئامێدییه، رۆژانە له ده‌ستپێكدا كونجییه‌كان به باشی ده‌شۆنەوە و لەسەر ئاگر ئامادەی دەکەن، دوای چەند قۆناغێکی زه‌حمه‌ت، تا‌عینێكی بە تامی لێ دروست دەكه‌ن.
ئه‌یاز هه‌ركی
