كاوە ئەحمەد، بۆ کوردستانی نوێ:

گۆرانی (پەشیمانی و كۆرپەی دڵ) ناسنامەی هونەريیم بوون

هونەرمەند كاوە ئەحمەد حەسەن، بە كاوە ژاژڵەیی ناسراوە،  دوای 45 ساڵ خزمەت خانەنشین كرا.
كاوە ژاژڵەیی بە دوالاپەڕەی وت: لەگەڵ تیپی شانۆی (لادێ) لە بۆنە و یادەكاندا بەشداربووم، دواتر تیپی هونەريی هەولێر ئامادەسازیان كردبوو تا چەند گۆرانییەك تۆماربكەن بۆ تەلەفزیۆنی بەغدا، یەكێك لە بەرهەمەكان گۆرانییەكەی من بوو بە ناوی (پەشیمانی) هۆنراوەی نازم دڵبەند و ئاوازی مامۆستای خوا لێخۆشبوو سەید ئەحمەد بەرزنجی بوو بە پەشیمانییەوە 3 گۆرانیم هەبوو.
وتیشی: دوایی ئەوەی بەهۆی سەربازيی و فیرارییەوە دووركەوتمەوە لە هونەر تا ناوەڕاستی نەوەدەكان جارێكی تر هاتمەوە نێو كۆڕی هونەر بە كۆمەڵی گۆرانی نوێوە، لە ناوەڕاستی نەوەدەكان نزیكەی 11 گۆرانیم بۆ تەلەفزیۆنی كوردستان Ktv ئاسمانی تۆماركرد، تا بگەینەوە ئاستی هونەر و گۆرانی كۆتایی حەفتاكان و سەرەتای هەشتاكان دەبێ زۆر چاوەڕوان بین و بزانین ئەكادیمیای سەردەم چەند حەسەن زیرەك و ماملێ و عەلی مەردان و تایەر تۆفیقمان بۆ دروست دەكەنەوە، گۆرانی (پەشیمانی و كۆرپەی دڵ) ناسنامەی هونەریيم بوون، رۆژێكی پڕ شكۆ بوو بۆ من ئەو رۆژەی ئەو گۆرانییەم تۆماركرد زۆربەی گۆرانییەكان ئاوازی خۆمن. 
ئالان محەمەد جەزا