ئا: كوردەوان محەمەد سەعید
رۆژی دوو شەممە لە فڕۆكەخانەی پەیام لە ناوچەی كەرەجی سەر بە پارێزگای ئەلبورز، ئاهەنگی كردنەوەی یەكەم پرۆژەی تەكسیی ئاسمانیی بە ئامادەبوونی موحسین حەسەنلو بەڕێوەبەری فڕۆكەخانەكە بەڕێوەچوو.
بەڕێوەبەری فڕۆكەخانەی پەیام رایگەیاند: پرۆژەكە رۆڵێكی باشی دەبێت لە بوژانەوەی ئابووریدا و نرخی گواستنەوەی نەفەریش بە تەكشیی ئاسمانیی، بە گوێرەی ژمارەی نەفەر و مەودای گواستنەوەكە لە شەش ملیۆن هەشت ملیۆن تمەنەوە دەست پێدەكات، كە دەكاتە نزیكەی 75 دۆلاری ئەمریكی.
سەرەتا بۆ چەند شارێك
پلانی هاتوچۆی تەكسیی ئاسمانیی، سەرەتا بۆ شارەكانی قەزوێن، كاشان، زەنجان، رامسەر، نەوشەهر و رەشت دەست پێدەكات و یەكەم تەكسیی ئاسمانییش گەشتێكی كرد بۆ شاری قەزوێن، بڕیاریشە گەشتی ئەزموونی تەكسییەكان لە نێوان تاران – كەرەج و زەنجاندا بێت.
ئەو فڕۆكانەی لە پرۆژەی تەكسیی ئاسمانییدا بەكار دەهێنرێن، بچووك و سووكەڵەن، بۆ ئەوەی زۆر بە خێرایی و ئاسانیی نەفەر بگوازنەوە، هەر بەهۆی بچووكیشیانەوە توانای هەڵسان و نیشتنەوەیان لە فڕۆكەخانە بچووكەكاندا هەیە.
خەونی زۆر كەس بوو
ئەم پرۆژەیە لە ساڵی 2020دا سەرەتا وەكو دەنگۆ بڵاوبۆوە، بەڵام لە مانگی تشرینی دووەمی 2021دا مەنوچەری مەنتیقی بەرپرسی گشتیی پێشووی سەنتەری تەكنەلۆژیا و كاروباری گواستنەوەی ئاسمانی بە رەسمی رایگەیاند، كە پرۆژەی تەكسیی ئاسمانیی مۆڵەتی رەسمیی وەرگرتووە.
ئێستا پرۆژەكە كەوتۆتە كار و موحسین حەسەنلو بەڕێوەبەری فڕۆكەخانەی پەیام لەو بارەیەوە دەڵێ: سێ كۆمپانیا لە پرۆژەی تەكسیی ئاسمانییدا كار دەكەن و بە هەر سێ كۆمپانیاكەش 24 فڕۆكەی بچووكیان دابینكردووە، فڕۆكەكان لە یەك نەفەرییەوە هەیانە تا 25 نەفەری و بە خستنەگەڕی ئەم پرۆژەیە، خەونی زۆر كەس دێتە دی كە لە قەرەباڵغی سەر جادە بێزار بوون، بۆ ئەو كەسانەش كە كاری زۆر بە پەلەیان هەیە، ئەم تەكسییانە بژاردەیەكی گونجاوە.
ئیقتیساد نیوز
