هونەرمەندی میللی كەركوك فایەق شەوكەت نادر كە بە (فایەق داودە) ناسراوە، رۆڵی گرنگی هەبوو لە زیندووكردنەوەی كەلتور و مەقاماتی كوردی و تا ئەمڕۆش بەردەوامە لە خزمەتكردنی هونەری كوردیدا.
هەرچەندە ئەم هونەرمەندە گۆرانیبێژێكی میللی ناسراوە، لە هەمان كاتیشدا دەهۆڵ لێدەر و زوڕنا ژەنیشە و یادگارییەكی دێرینی هەیە لە مانگی رەمەزانی ساڵانی حەفتاكانی سەدەی پێشوو كە لەگەڵ هەریەك لە هونەرمەندان (سەڵاح داودە و ئەحمەد داودە) پارشێوانی رەمەزان بە دەهۆڵ و زوڕناوە گەڕەكە میللییەكانی شاری كەركوكییان بەسەر دەكردەوە بۆ بە ئاگاهێنانی هاووڵاتیان بۆ پارشێوكردن.
فایەق داودە ساڵی 1946 لە قەزای خورماتوو چاوی بە دونیا هەڵهێناوە، ئێستا دانیشتووی گەڕەكی شۆریجەی شاری كەركوكە و چایخانەكەی (حەمەگوڵناز) لەو گەڕەكەدا بارەگای سەرەكی ئەم هونەرمەندە میللییەیە.
رزگار شوانی - كەركوك
