عەبدولڕەحمان تاوگۆزی، بۆ کوردستانی نوێ :

هەندێ كەرەستە، لە رێگەی هونەرەوە دەكرێنە تابلۆیەكی جوان

عەبدولڕەحمان تاوگۆزی مامۆستای وانەی كوردی (ئەلفبێ)یە، لە گوندی (سەرشاتە)ی دەڤەری (تاوگۆزی)یە، زیاتر لە 11 ساڵە كاری هەڵكۆڵین دەكات.
عەبدولڕەحمان تاوگۆزی بە دوالاپەڕەی وت: زیاتر لە 11 ساڵە سەرقاڵی نەخش و نیگار و هەڵكۆڵینم، لە كارەكەمدا تەماحی ماددیم نەبووە تا بەوجۆرە خۆمی پێوە سەرقاڵ بكەم، بەڵام  وەك لایەنی هونەریی جوان و ناوازەیە.
وتیشی:  بەردەكان لە كات و ساتی سەردان و سەیران بۆ شوێنە جیاجیاكانی كوردستان بە شوێنی دەگەڕێم و هەڵیاندەبژێرم، كاری هونەریی من هەڵكۆڵین نییە، بەڵكو وێنەكردن و كاری نووسین و نەخشە لەسەر توێكڵی (فستق، گوێز) و (فاسۆلیا و قامیش و پەڕی باڵندە) و زۆر شتی تریش نەخش و وێنە و نیگارمان كردووە، لە چەند شار و شوێنێك داواكراوە و پێشنیاری كردنەوەی پێشانگەیان لێكردووم، بەڵام زۆرجار بەهۆی سەرقاڵیی پیشەی مامۆستایەتی و لەبەر زەحمەت و گواستنەوە بەڵێنم نەداوە، ئەو كەرەستە و ماددانەی بەكاری دەهێنم بریتین لە بۆیە و قەڵەم ماجیك و بەرد و هەر شتێ بەدەستەوە بێت، بەو هۆیەشەوە هەندێ كەرەستە فڕێنادرێنە ژینگەوە و لە رێگەی هونەرەوە دەكرێنە تابلۆیەكی جوان.

محەمەد عەبدولڕەحمان-شارەزوور