شەهید رەئوف بەشارەتی

شەهید رەئوف رەحیم مستەفا ناسراو بە رەئوف بەشارەتی، لەدایكبووی ساڵی1967ی بنەماڵەیەكی كوردپەروەری ناحیەی (سیروان)ی سەر بە پارێزگای هەڵەبجەیە.
لەسەرتای لاوێتیدا و وەك هەستكردن بە ئەركی بەشداریكردن لە خەباتی رزگاریی نەتەوەییدا، ساڵی 1980پەیوەندیی كردووە بە رێكخستنەكانی كۆمەڵەی رەنجدەرانی كوردستانەوە، ئەندامێكی چالاك و دڵسۆز و گورج و گۆڵی خەباتی نهێنی بووە.
ساڵی 1981 لەلایەن رژێمەوە ئاشكرا دەبێت و بەو هۆیەوە لە خوێندن دادەبڕێت و ماوەیەك خۆی دەشارێتەوە، هەر لەوكاتەدا باوكی لەلایەن رژێمەوە دەستگیر دەكرێت و تا ساڵی 1982 زیندانی دەبێت، شەهید رەوف هەر لەو ساڵەدا دەبێتە پێشمەرگە لە تیپی 55ی قەرەداخ.
لە ماوەی پێشمەرگایەتیدا بەشداریی چەندین نەبەردیی پێشمەرگانەی كردووە، لەوانە: داستانی قەیوان- ماوەت، شەڕەكانی شارەزوور و قەرەداخ و ناوچەی هەورامان، لەتەواوی شەڕەكانیشدا دووجار بریندار كراوە.
هەروەها كاریگەرانە بەشداریی راپەڕینی ساڵی 1991ی كردووە، دوای راپەڕینیش بەردەوام بووە لە خەبات و دوا پلەی فەرماندەی لەشكربوو.
بەداخەوە، شەوی 3\4/12/2002 لە شەڕی گروپی بەناو (ئەنسارو ئیسلام)دا لە گردەدرۆزنەی گوندی تەپەكوڕەی هەڵەبجە، لەگەڵ كۆمەڵێك هاوڕێیدا، شەهیدكران.