پێشمەرگەی دێرین و مامۆستای شۆڕش، هۆگر محەمەد ئەمین

ئا/ ئالان محەمەد جەزا 

پرۆفایل
هۆگر محەمەد ئەمین، مامۆستا هۆگر، لە دایكبووی ساڵی 1968ی شاری سلێمانی.
ساڵی 1983 پەیوەندیی كردووە بە رێكخستنەوە و ساڵی 1986 بووە بە پێشمەرگە و مامۆستای شۆڕش.
ئێستا مامۆستایە لە بەڕێوەبەرایەتیی پەروەردەی سلێمانی. 

لایەنی پەروەردەیی و رۆشنبیركردنی ئەندامانی رێكخستن، دەگەڕایەوە بۆ توانا و لێزانی و دانایی لێپرسراوەكانی رێكخستن، ئەوكاتە پەرتووك و سەرچاوەكانی بابەتی خەبات و سیاسەت و شۆڕگێڕێتی زۆر كەم بوون و دەستیش نەدەكەوتن، دەبوایە سەرەمان بگرتایە تا كتێبێكمان لەبارەی شۆڕشەكانی گەلانی دیكەوە دەستبكەوێت، ئەگەر هەشبوایە، هاوڕێیەكی نزیك و بڕوا پێكراو نەبوایە، یان لە رێگەی رێكخستنەوە نەبوایە، دەست نەدەكەوت، یاخود هۆنراوەی سیاسی و تۆماری نیشتمانی، بە زەحمەت دەستدەكەوتن.
رژێم گەنجەكانی هەراسان كردبوو، لێپرسینەوەی زۆردارەكی لێدەكردن، لە سەر شەقامەكان  و لەسەر جۆر و رەنگی پۆشاك، توندو تیژیی بوو لەگەڵ دانیشتوانی شارەكان، ئەمانە هۆكاربوون كە گەنج دەرچەیەك بدۆزێتەوە بۆ رزگاربوون.
ئەو بارودۆخە، بیروباوەڕی نیشتمانی و ئیرادەی بەهێز و زیاتر خۆشەویستیی نیشتمانی بۆ دروست دەكردیت، بڕوابوونی بە ئازادی و سەركەوتن لەلا دروست دەكردیت، بڕوابوون بە رێكخستن و هێزی پێشمەرگە و بە سەركردایەتی شۆڕشەكە، بۆیە بە پۆل گەنجەكان روویان دەكردە خەباتی نهێنی و دواتریش پێشمەرگایەتی.
هەر هەڤاڵێكیش دەستگیر دەكرا، دیارە پێشتر لەسەر نهێنی پارێزی راهێنراوە، بۆیە نهێنییەكانی دەپاراست و دەبووە مایەی شانازیی بۆ خۆی و خێزان و بۆ رێكخستن و نەتەوەكەشی، یاخود كە شەهید دەكرا دەبووە مایەی سەربەرزیی بۆ هەموولایەك.
هەوەرها كاتێك هەواڵی شەهیدبوونی برادەرێكمان دەبیست، خۆڕاگرتر و رقئەستوورتر دەبووین.
من ساڵی 1983 پەیوەندیم كردووە بە رێكخستنەوە، رۆژی 17/10/1985 قەدەغەی هاتووچۆبوو لە سلێمانی، رژێمی بەعس لە بەرەبەیاندا بە بڵندگۆ و بە هێلیكۆپتەر لە ئاسمانەوە خەڵكی شاری سلێمانی ئاگادار كردەوە كە لە ماڵەكانیان نەیەنە دەرەوە، هاتوچۆ قەدەغەیە.
لەماڵی خۆمان بووم دەستگیركرام، لە ئۆتۆمبێلەكەدا كۆمەڵیك برادەری خۆمی تیابوو كە ئەوانیش دەستگیركرابوون، بە كۆمەڵ بردیانین بۆ ئیستخباراتی عەسكەری لەناو حامیە (پاركی ئازادی ئێستا)، دوای چەند مانگێك ئازادكرام، سەرەتای ساڵی 1986 شارم بەجێهێشت و لە بارەگای مەڵبەندی یەك لە گوندی بەلەكجاڕی قەرەداغ گیرسامەوە.
ئەوكاتەش رژێم یەكە ئیدارییەكانی خۆی لە ژێر دەسەڵاتی پێشمەرگەدا كشاندبۆوە، هاوكاتیش بە بڕیاری بەڕێز مام جەلال (مامۆستای شۆڕش) دامەزرێندران، مامۆستاكان لەو پێشمەرگانە پێكدەهاتن كە خاوەن بڕوانامەبوون، خولیان بۆكرایەوە، دوای خولەكانیش هەڵسەنگاندنیان بۆكرا و دابەشكران بەسەر گوندەكاندا، من بەر گوندی (قارەمان) كەوتم، دواتر بۆ گونــدی (مچــەكوێــــر) لە سنووری تیپی 55ی قەرەداغ، لەگەڵ مامۆستایەكی دیكە بەناوی محەمەد دەستمانكرد بە وتنەوەی وانە، دوای نیوەڕوانیش بنكەی نەهێشتنی نەخوێندەواریمان كردبۆوە بۆ پیاوانی گوندەكە.
بەداخەوە، دۆخی ئێستای خەباتگێڕانی دێرین باش نیە، موچەو دەرامەتیان بەشی هەموو پێداویستییەی رۆژگار ناكات.