هونه‌رمه‌ند ده‌شتی كه‌ڵهوڕی، به ره‌چه‌ڵه‌ك خه‌ڵكی شارۆچكه‌ی خانه‌قینه، به‌ڵام له شاری كه‌ركوك له‌دایكبووه، سه‌رده‌می منداڵی تا قۆناغی دواناوه‌ندیشی له گه‌رمیان و له شاره جوانه‌كه‌ی كه‌لار ته‌واو كردووه.
ده‌شتی كه‌ڵهوڕی به دوالاپه‌ڕه‌ی راگه‌یاند: هاتنم بۆ نێو دنیای هونه‌ر به رێكه‌وت نه‌بوو، دنیای هونه‌ر و گۆرانی به لای منه‌وه دنیایه‌كی جوان بوو، ده‌توانم بڵێم (دڵم ئه‌مشه‌و) یه‌كه‌م گۆرانیم بوو، كه ده‌نگدانه‌وه و هه‌وادارێكی باشی هه‌بوو، هه‌ربۆیه بڕیارمدا له‌م بواره‌دا زیاتر بچمه پێشه‌وه، دوا به‌دوای ئه‌و گۆرانییه‌ش له كۆنسێرتێكی مامۆستا نامدار قه‌ره‌داغی به‌شداریمكرد، كه كۆنسێرتێك بوو پێكهاتبوو له گرووپێكی ئۆركێسترای سه‌مفۆنی و میوزیكی هۆڵەندی، له‌و كۆنسێرته‌دا به جل و به‌رگێكی كوردییه‌وه ده‌ركه‌وتم و گۆرانی (ئه‌مشه‌و شه‌وی به‌راته)م پێشكه‌شكرد، هه‌ڵبه‌ته ئه‌م كۆنسێرته پێش 11 ساڵ بووە.
وتیشی: كه‌سێكی ئه‌وتۆ نه‌بوو رێپیشانده‌رم بێت بۆ نێو دنیای هونه‌ر و میوزیك ته‌نها خۆم بووم، سه‌ره‌تا ئاوازێكی فارسیم هێنا، خۆم شیعرم بۆ دانا و مامۆستا(عارف ئیبراهیم پۆر) موزیك و دابه‌شكردنی بۆ كرد، له یوتيووب و ماڵپه‌ڕه‌كان بڵاوبۆووه‌وه و ده‌نگدانه‌وه‌یه‌كی باشی هه‌بوو، تا ئێستا زیاتر له 20 گۆرانیم هه‌یه، هاوكات 12 گۆرانیش له‌و گۆرانیانه كراون به كلیپ و له یوتيووب و ماڵپه‌ڕه‌كان بڵاوكراونه‌ته‌وه، هه‌میشه هه‌وڵمداوه له هه‌ردوو ستایلی كلاسیك و ئاوازی سه‌رده‌میانه گۆرانیم هه‌بێت، هه‌موو ئه‌و گۆرانیانه‌ی وتوومن بۆ من هه‌ر یه‌كه‌یان چێژ و تامی خۆیان هه‌یه، ده‌توانم بڵێم هه‌موویان له دڵمه‌وه نزیكن، تا ئێستا به تایبه‌ت گۆرانیم بۆ خانه‌قین نه‌وتووه، به‌ڵام دوو گۆرانیم به زاراوه‌ی كه‌ڵهوری وتووه كه زاراوه‌ی خانه‌قینه و خانه‌قین زێدی باو و باپیرنی منه، وه‌ك وه‌فادارییه‌ك بۆ گه‌رمیان و شاری كه‌لار گۆرانی(له رۆژانی غوربه‌تیما)م تۆماركردووه.
دیانا ئەحمەد
