ئا: فاروق سه‌عید حه‌سه‌ن
پسپۆڕێكی ئابووری:
دەبێ حكومەتی عیراق ژێرخانێكی پتەو و شایستە بۆ كەرتی گەشتیاریی بنیات بنێت، وەك: دروستكردنی سەیرانگە و هۆتێل و چێشتخانە و رێگاوبان و پەرەپێدانی گواستنەوە و گەیاندن
عیراق لە رووی گەشتیارییەوە لە زۆربەی وڵاتانی جیهان دەوڵەمەندترە، لەبەر ئەوەی زۆربەی جۆرەكانی گەشتیاریی تێدا كۆبۆتەوە، وەك: گەشتیاریی شوێنەوار، ئایینی، سروشتی، كاتبەسەربردن و ..هتد، بە واتایەكی دیكە، عیراق بنەماكانی گەشتیاریی تێدایە و حكومەتیش لە هەوڵدایە بۆ پێشخستنی ئەو كەرتە و پتەوكردنی ژێرخانەكەی، كە سەرەنجام دەبێتە پشتیوانییەكی بەهێز بۆ ئابووریی وڵات.
د. وەفا ئەلمەهداوی پسپۆڕی ئابووری بە رۆژنامەی سەباحی راگەیاند: كەرتی گەشتیاریی یەكێكە لە كەرتە پڕبایەخەكان و بەشداریی لە بەدەستهێنانی داهاتی گشتیدا دەكات، یارمەتیدەریشە بۆ كەمكردنەوەی بێكاریی و هەژاریی، عیراقیش خاوەنی چەندین شوێنەواری مێژووییە، كە كۆڵەکەیەكی گرنگن بۆ راكێشانی گەشتیاری بیانی، هەروەها خاوەنی چەندین شوێنی گەشتیاریی ئایینییە و لە باكووریشەوە سروشتی دڵڕفێنی هەیە، كە هەموو ئەمانە هۆكارن بۆ راكێشانی گەشتیار.
ستراتیژێكی گشتگیرانە
د. نەغەم حسێن راگری كۆلێژی كارگێڕی ئابووری لە زانكۆی نەهرەین وتی: پێویستە عیراق ستراتیژێكی گشتگیرانە بگرێتەبەر بۆ پەرەپێدانی كەرتی گەشتیاری، ئەو ستراتیژەش دەبێ بەر لە هەموو شتێك سەقامگیركردنی ئاسایش بگرێتەوە و كەشێكی پڕ لە ئارامی دابین بكات بۆ گەشتیاریی ناوخۆیی و دەرەكیش، پاشان دەبێ ژێرخانێكی شایستە بۆ كەرتی گەشتیاریی بنیات بنێت، وەك: دروستكردنی سەیرانگە و هۆتێل و چێشتخانە و رێگاوبان و پەرەپێدانی گواستنەوە و گەیاندن.
موئەیەد هەیسەم بەڕێوەبەری پشكنین لە دەستەی گەشتیاریی عیراق سەبارەت بە هەوڵەكانی حكومەت لەو بوارەدا وتی: هەڵبژاردنی بەغدا وەك پایتەختی گەشتیاریی ئەم ساڵ لەسەر ئاستی وڵاتانی عەرەبی، بەڵگەی ئەوەیە كە حكومەتی عیراق هەوڵی بێوچانی داوە بۆ پەرەپێدانی كەرتی گەشتیاری تا بگاتە ئەو ئاستە.
سەرچاوە: رۆژنامەی ئەلسەباح
