بەبۆنەی یادی نەورۆزی كوردان، لە شاری سلێمانی چەندین چالاكی جیاواز و هەمەڕەنگ و تایبەت بەو بۆنەیەوە سازدەكرێت.
جەزای ساز سەرۆكی كۆمەڵەی هونەری و میللی كوردستان بە دوالاپەڕەی راگەیاند: فێستیڤاڵی نەورۆزی ئەمساڵ چالاكییەكی خۆبەخشی هونەری میللی كوردستانە كە زیاتر لە 25 ساڵە لەسەر شەقامەكان خۆبەخشانە سازیدەكەین، یادەكە ساڵانە زۆرجار لە (شەقامی سالم یان لەبەردەم پاڵاس یان لە گردی مامە یارە یان لە بناری گۆیژە) بەڕێوەدەچێت، هەر ساڵەو لە شوێنێكی شار یادەكە بەرز دەنرخێنین، ئەم دووساڵە بەهۆی رەمەزانەوە یادەكەمان هێناوەتەوە شەقامی سالم سەعات 7ی ئێوارە دوای بەربانگكردن و رۆژووشكاندن ئاگری نەورۆز دەكرێتەوە، چالاكییەكان بریتین لە ئامادەبوونی چەندین گۆرانیبێژی میللی و چوار گروپی هەڵپەركێ و چەندین چالاكی جۆراوجۆر، هاوكات لە فێستیڤاڵەكەدا كارەكتەری كەسایەتییە كوردەكان لەسەر شانۆكە نمایشدەكرێت، مەراسیمەكە بە شیعر و گۆرانی و موزیك و هەڵپەركێ تا 12ی شەو بەردەوام دەبێت.
هەر لەمبارەیەوە محەمەد مەردان سەرۆكی كەلەپوور و فۆلكلۆری كوردی بە دوالاپەڕەی وت: ئەوەی لای ئێمە زۆر گرنگە ئەوەیە كە ئەمساڵ سرودی كاوەی ئاسنگەر دەستپێكی یادەكەمان دەبێت، ئەم سروودە بە یەكەم سروودی كوردی دادەنرێت، هەربۆیە بەم سرودە دەستپێدەكەین، چالاكییەكانمان لە كۆمەڵێك بڕگەی هەمەجۆر پێكهاتووە، كە بریتین لە كەسایەتییەكانی كاوەی ئاسنگەر و پیرەمێرد و چەند كەسایەتیيەكی تر دێنە ناو خەڵك و ئاگری نەورۆز دەكەنەوە، یادەكەی ئەمساڵمان جیاوازە، چونكە مایكێك لەسەر ستەیج دادەنێین و لیژنەیەكمان پێكهێناوە تا هەركەسێك بەهرەیەكی هەبێت و بۆی نەرەخسابێت بەهرەكەی بناسێنێت ئەوە لە رێگەی مایكەكەمان دەتوانێت چانسی خۆی تاقیبكاتەوە و بناسرێت، هەر هونەرمەندێك یان هەر شاعیرێك بیەوێت بەشداربێت لەسەر ستەیج دەتوانێت ناو بنوسێت و لەم یادە مەزنەدا لەگەڵماندا بەشداربێت، بۆ هەمیشە یادی جەژنی نەورۆز بەرز رادەگرین، چونكە پەیامە پیرۆزەكەی (پیرەمێرد)ی نەورۆزپەروەری مەزنمان بیردەخاتەوە، وەك (پیرەمێرد) دەفەرمووێت: ئەوەی خۆی بەخۆمان دەزانێت، بانگهێشتنی ناوێت، ئەمڕۆ یادەكە سەعات 3ی پاشنیوەڕۆ لە گردی مامە یارە لە سلێمانی بەڕێوەدەچێت.
یەسنا محەمەد
