قوباد تاڵەبانی جێگری سەرۆك وەزیران بە جیا لەگەڵ نیكۆلۆ فۆنتایا باڵیۆزی ئیتالیا، گلێن مایلز باڵیۆزی ئوسترالیا لە عیراق كۆبووەوە و باس لە دوایین بەرەوپێشچوونەكانی پرۆسەی پێكهێنانی كابینەی دەیەمی حكومەتی هەرێم، كرا.
لە هەردوو كۆبوونەوەكەدا، كە دوێنێ بەڕێوەچوون، قوباد تاڵەبانی روونیكردەوە: لێكتێگەیشتنی زۆرباش لەنێوان پارتی و یەكێتی دروستبووە و لە دوایین كۆبوونەوەشدا لەسەر رەشنووسی دیدگای هاوبەش بۆ حكومڕانی لە هەرێم رێككەوتوون، راشیگەیاند: بەپێی ئەم دۆخە ئەرێنییەی دروست بووە، پرۆسەی پێكهێنانی حكومەت خێراتر بووە و گەشبینین لە ماوەیەكی نزیكدا حكومەتی داهاتووی هەرێم پێكبهێنرێت، ئاماژەی بەوەشدا، هەردوو لایەنی پارتی و یەكێتی هاوڕان كە بەپێی ئەو دۆخەی لە ناوچەكەدا دەگوزەرێت و هەروەها بۆ جێبەجێكردنی داواكارییەكانی هاووڵاتیان، پێویستە حكومەتێكی بەهێز و كارا و یەكگرتوو پێكبهێنرێت.
