لە راگەیاندراوێکدا، باڵیۆزخانەی ئەمریکا لە سوریا، پیرۆزبایی جەژنی نەورۆز و سەری ساڵی کوردی لە گەلی کورد لە سوریا دەکات.
لە راگەیەندراوەکە دا کە دوێنێ پێنجشەممە، 20ی ئاداری 2025 بڵاوکرایەوە، باڵیۆزخانەی ئەمریکا لە سوریا، گەرمترین پیرۆزبایی لە کوردەکانی ئەو وڵاتە دەکات بەبۆنەی هاتنەوەی جەژنی نەورۆزەوە.
لە بەشێکی دیکەی راگەیەندراوەکەدا هاتووە، هەروەکوو چۆن کاوە ئاگری نەورۆزی هەڵکرد و رۆژێکی نوێی راگەیاند، هیوادارین ساڵی نوێ پڕ بێت لە روناکی و درەوشانەوە و ئومێد و بەهار.
باڵیۆزخانەی ئەمریکا لە کۆتایی راگەیەندراوەکەیدا هیوای خواستووە کە ساڵی نوێی کوردی ببێتە مایەی ئاشتی، تەندروستی و پێشکەوتن بۆ کوردەکانی سوریا.
نەورۆز، کە جەژنی سەری ساڵی کوردییە، یەکێکە لە گرنگترین بۆنە نەتەوەییەکانی گەلی کورد و لە زۆربەی ناوچە کوردنشینەکان بە شێوەیەکی فەرمی یادی دەکرێتەوە.
