راپۆرتی: جێگر خدر
بە هەوڵی پەرلەمانتارێکی یەکێتی و لەسەر بڕیاری وەزیری ژینگەی عیراق، بڕی «12» هەزار نەمام بۆ سەوزکردنی ئیدارەی راپەڕین تەرخانکرا، پێنج هەزار نەمام وەک یەکەمین بڕ گەیشت و بەسەر شارەوانییە جیاوازەکانی ئیدارەکەدا دابەشکرا.
«بەدرییە حسێن» ئەندامی ئەنجومەنی نوێنەرانی عیراق، بە کوردستانی نوێ-ی راپەڕینی راگەیاند: بەوپێیەی ئیدارەی راپەڕین لە سەردەمی بەعسدا چەندین جار دووچاری شێواندنی ژینگەیی بووەتەوە و بە هەستکردن بە پێویستی، داوام لە وەزارەتی ژینگەی عیراق کرد بەشداربن لە سەوزکردن و بوژانەوەی ژینگەی ئەو ناوچەیە، خۆشبەختانە هەرزوو «د. هەڵۆ عەسکەری» وەزیری ژینگە هاتە سەرخەت و رەزامەندیی دەربڕی لەسەر ئەوەی «12» هەزار نەمام بنێردرێت. لە یەکەم هەنگاویشدا پێنج هەزار نەمام رەوانەکرا و لە مۆنۆمێنتی راپەڕین بەسەر 13 شارەوانیی سنوورەکەدا دابەشکرا.
وتیشی: کارم لەسەر ئەوە کردووە، جۆری ئەو نەمامانەی بۆ راپەڕین دەنێردرێن سوودبەخش بن و لەگەڵ ژینگە و کەشوهەوای سنووری راپەڕیندا گونجاو بن، وتیشی: ئێستا پێنج هەزار نەمام لە جۆری باش دابەشکراوە و چاوەڕوانی دابینکردنی ئەو ژمارەیەی دیکەشین، بەڵام بەو مەرجەی هەڵسەنگاندنی بۆکرابێت و بە کەڵک بێت، راشیگەیاند: ئەو جۆرانەی گەیشتوون پێکدێن لە”سەروو عەمودی، مەشهەدی، سۆیا، لانگسترۆم” ئەمانە هەموویان گونجاون بۆ کەشوهەوای ئیدارەی راپەڕین و رۆڵ دەبینن لە بنیاتنانی ژینگەیەکی لەبارتر بۆ سنوورەکە.
هەر لەوبارەیەشەوە «ساوێن ساڵح» بەڕێوەبەری فەرمانگەی ژینگەی راپەڕین لە لێدوانێکیدا بۆ کوردستانی نوێ-ی راپەڕین، ئاماژەی بۆ ئەوەکرد کە راپەڕین پێویستیی زۆری بە هاوکاری و هاوئاهەنگی دەستە و وەزارەتی ژینگەی عیراق هەیە، بەوپێیەی هێشتا دوورین لە گەیشتن بە رێژەی ستانداردی سەوزایی لەنێو شارەکاندا، لەکاتێکدا دەبێت 35 %ی شارەکان سەوزایی بێت، کەچی رێژەکە لەناو شارەکانماندا لە
10 % کەمترە، ئەگەرچی ژینگەی سنوورەکەی ئێمە تا رادەیەک خاوێنترە بە بەراورد بە زۆر شوێنی دیکە، چونکە کارگەی گەورەی کەمتر لێیە تا کەشوهەواکە پیس بکات. وتیشی: چاندنی هەزاران نەمام هەوڵێکی زۆر باشە، ئومێدمان وایە هاوکاری لەوجۆرە بەردەوامبن.
