پاولۆ سێرجیۆ سەرۆکی لیژنەی لێکۆڵینەوەی ئایندەی نێودەوڵەتی تایبەت بە سوریا، لە راپۆرتێکیدا کە پێشکەشی ئەنجوومەنی مافی مرۆڤی سەربە نەتەوە یەکگرتووەکانی کردووە رایگەیاندووە: چەکدارانی داعش چالاکییەکانیان لە ناوەڕاست و خۆرهەڵاتی سوریا زیادکردووە.
لەو رووەشەوە سێرجیۆ داوای لە وڵاتانی ئەندامی نەتەوە یەکگرتووەکان کردووە هەوڵی گێڕانەوەی هاووڵاتییەکانیان بدەن لە باکووری خۆرهەڵاتی سوریا بۆ وڵاتەکانی خۆیان و ئەوانەش کە لە بەرپرسیارن لە کەیسەکانی تاوان و تێوەگلاون، پێشکەش بە دادگایان بکەن.
لەبارەی رێککەوتننامەی نێوان دەسەڵاتدارانی نوێی دیمەشق و هێزەکانی سوریای دیموکراتیشەوە، ناوبراو ئاماژەی بەوە داوە کە رێککەوتنەکە هاندەرە بۆ ئاگربەست لەسەر ئاستی نیشتمانیی سوریا و گەرەنتیی مافی هەموو سوریاییەکان لە نوێنەرایەتی کردن و بەشداریی سیاسی لە داهاتوودا.
لەو رووەشەوە جەخت لە کۆتاییهێنان بە توندوتیژیی بەردەوام دەکاتەوە لەو وڵاتە و داوا دەکات هەرچی زووە ئاگربەست لەسەر ئاستی هەموو وڵاتەکە رابگەیەندرێت و هەموو گروپە چەکدارەکان لەچەک دابماڵرێن و تێکەڵاوی سوپا بکرێن و گەرەنتیی سیستمی گشتی بکرێت.
ئەو نوێنەرە نێودەوڵەتییە پێشیوایە کە مایەی نیگەرانییە توندوتیژی و کاری دوژمنکارانە لە هەندێک ناوچەی سوریادا بەردەوامە و دەڵێت ئەو دۆخە ئەگەری ئەوەی لێدەکرێت وڵاتەکە بگەڕێنێتەوە بۆ ململانێیەک لەسەر ئاستێکی فراوانتر، بەتایبەتی ئەو رووداوانەی بەم دواییە لە ناوچەکانی لازقییە و تەرتوس هاتنە ئاراوە و بووەهۆی کەوتنەوەی ترس و دڵەڕاوکێ و چەندین هاووڵاتی لەژێر کاریگەریی پاکتاوی تایفیدا بوونە قوربانی و بەو هۆیەشەوە چەندین کەس ماڵ و حاڵی خۆیان بەجێهێشت.
بەوتەی ئەو نوێنەرە نێودەوڵەتییە هەنووکە چەندین کەس کە رەگەزنامەی سوریایان نییە خزاونەتە ناو هێزەکانی سوپای نوێی سوریاوە و چەندین کەسیان لەژێر کاریگەریی ململانێی تایفیدا لەناو ماڵەکانی خۆیاندا کوشتووە.
