دوێنێ، شێخ جەعفەر شێخ مستەفا جێگری سەرۆكی هەرێم، پێشوازی لە كۆلۆنێڵ لوكا ڤێلزیك فەرماندەی سەربازیی هێزی هاوپەیمانیی ئیتاڵیا كرد و جەخت لە پتەوكردنی پەیوەندی و هاوكارییەكان كرایەوە.
جێگری سەرۆكی هەرێم، رۆڵی هێزەكانی ئیتاڵیای لەچوارچێوەی هاوپەیمانیی نێودەوڵەتیی دژ بە داعش و هاریكاریی و یارمەتییە سەربازییەكانی، بەتایبەت مەشق و راهێنانەكانیان بە هێزەكانی پێشمەرگە، بەرزنرخاند.
لای خۆیەوە، كۆلۆنێڵ لوكا ڤێلزیك، بەردەوامبوونی پشتگیریی و هاریكارییە سەربازییەكانی وڵاتەكەی بۆ پێشمەرگە دووپاتكردەوە و ئۆپەراسیۆنە هاوبەشەكانی نێوان پێشمەرگە و سوپای عیراق و هێزی هاوپەیمانان، بە گرنگ زانی.
لە دیدارەكەدا، دوایین پێشهاتەكان و بارودۆخی سیاسی و ئەمنی، چاكسازییەكانی وەزارەت و خێراكردنی پرۆسەی یەكخستنەوەی پێشمەرگە، گفتوگۆیان لەبارەوە كرا.
