بەمەبەستی جێبەجێكردنی یاسای ژمارە 35ی ساڵی 2007ی كاری رۆژنامەنووسی لە هەرێمی كوردستان و یەكلاكردنەوەی دۆسێی رۆژنامەنووسان لەسەر بنەمای ئەو یاسایە، بۆردی یاسایی فیدراسیۆنی رۆژنامەنووسانی سەربەخۆ، لەهەوڵدایە دادگاكانی لێكۆڵینەوە و كەتنی هەولێر تایبەتمەند بكرێن بە دۆسێی رۆژنامەنووسان و یەكلاكردنەوەی سكاڵاكانیان.
لە لێدوانێكدا بۆ كوردستانی نوێ، پارێزەر كارزان رەشید لێپرسراوی بۆردی یاسایی فیدراسیۆنی رۆژنامەنووسانی سەربەخۆ، رایگەیاند: بۆردەكەیان لەڕێگەی دادگای تێهەڵچوونەوەی هەولێرەوە لە هەوڵەكانیان بەردەوامن بۆ تایبەتمەندكردنی دادگاكانی لێكۆڵینەوە و كەتن تایبەت بە یەكلاكردنەوەی دۆسێی رۆژنامەنووسان لە سنووری پارێزگای هەولێر، كە لە سلێمانی ئەو كارە كراوە و دادگایەك تایبەت كراوە بە دۆسێی رۆژنامەنووسان.
ئاماژەی بەوەشكردووە كە تەرخانكردنی ئەو دادگایانە بۆ دۆسێی رۆژنامەنووسان، هەنگاوێك دەبێت بەئاڕاستەی جێبەجێكردنی یاسای ژمارە 35ی ساڵی2007ی كاری رۆژنامەنووسی لە هەرێمی كوردستاندا و بۆ ئەوەی چیتر رۆژنامەنووسان بە یاسای سزادانی عیراقی، دادگایی نەكرێن.
لێپرسراوی بۆردی یاسایی فیدراسیۆنی رۆژنامەنووسانی سەربەخۆ، ئەوەشی خستەڕوو كە پێویستە ئەو دادگایانەی بۆ ئەو دۆسێیانە تەرخان دەكرێن، لەلایەن دادگای تێهەڵچوونەوەوە دەستنیشان بكرێت، هاوكات ئەو دادوەرە ئاگاداری یاسای كاری رۆژنامەوانی بێت و شارەزایی لە كاری راگەیاندن و ئەرك و مافەكانی رۆژنامەنووساندا هەبێت.
تەها عەبدوڵڵا
