بەڕێوەبەری گشتی بەنداوەكانی هەرێمی كوردستان بۆ کوردستانی نوێ :

چوار بەنداوی گەورەی كارۆئاوی لە هەرێم دروست دەكرێت

كوردستانی نوێ/ هەولێر


رەحمان خانی بەڕێوەبەری گشتیی بەنداوەكان لە وەزارەتی كشتوكاڵ و سەرچاوەكانی ئاوی هەرێم، تیشك دەخاتە سەر ژمارەی بەنداوەكان لە هەرێمی كوردستان و ئاستی ئاوی ئەو بەنداوانە لەكاتی ئێستا و كاریگەریی كەمی رێژەی بارانبارین، هەروەها ئاماژە بە گرنگی شوێنی جوگرافی بۆ دروستكردنی بەنداوەكان و هەوڵەكانیان بۆ تەواوكردنی ئەوانەی لە لایەن حكومەتی فیدڕاڵەوە بڕیاریان لەسەر دراوە.
سەرەتا لەبارەی ژمارەی بەنداوەكان رایگەیاند: ژمارەی بەنداوەكان لە هەرێمی كوردستان، بچووك و مامناوەند 21 بەنداون، كە توانای كۆكردنەوەی ئاویان هەبێت، جگە لە هەرسێ بەنداوە گەورەكە دوكان و دەربەندیخان و دهۆك كە لە كۆنەوە بەردەوامن لە خزمەتدەكەن، هەروەها بەنداوی گۆمەسپان ئەویش بە بەنداوی گەورە دەژمێردرێ و زۆربەی كارەكانی تەواو بون و ئێستا 10ملیۆن م3 ئاوی تێدایە.

رەحمان خانی:
بۆ دروستكردنی بەنداوەكان رەچاوی شوێنی جوگرافی و هاوسەنگی لە دابەشكردن و دروستكردنی بەنداوەكان بۆ تەواوی ناوچەكانی هەرێم دەكەین

لەبارەی ئاستی ئاوی ئەو بەنداوانە لەكاتی ئێستادا وتی: ئاستی ئاوی بەنداوەكان بەشێكیان لە ساڵی پار نزمترن، ئەوەش پەیوەستە بە كەمی بارانبارین لەمساڵدا، كە لە زۆربەی ناوچەكان كەمتر لە 50% ساڵی رابردوو باریووە، هاوكات كەمیی داهاتی ئاو لە سەرچاوەكانەوە، لەگەڵ ئەوەش هێشتا ئەگەری بارانبارین ماوە، چاوەڕێی بەرزبوونەوەی زیاتری ئاستی ئاو دەكەین.
لەبارەی بڕیاری شوێنی دروستكردنی بەنداو و رەچاوكردنی شوێنی جوگرافی وتی: ئێمە لە پلانی خۆمان وەكو وەزارەتی كشتوكاڵ و سەرچاوەكانی ئاو، هەم رەچاوی هاوسەنگی دەكەین لە دابەشكردنی بەنداو دروستكردن بۆ تەواوی ناوچەكانی هەرێم و هەمیش رەچاوی پێویستیی زۆری ناوچەیەك بەئاو دەكەین، كە زۆرترین  كاریگەریی كەم ئاوی و وشكەساڵی و گۆڕانی كەشوهەوای لەسەربێت. 
لەبارەی كاركردن لەو بەنداوانەی لەسەر بودجەی عیراق لە هەرێمی كوردستان دروست دەكرێت رەحمان خانی وتی: هەوڵەكانمان لەگەڵ عیراق بەردەوامە، بۆ تەرخانكردنی بودجەی چاككردنەوەی بەنداوە گەورەكان و دروستكردنی 4 بەنداوی كارۆئاوی گەورە لە هەرێم، لەسەرەتای مانگی ئازاری ئەمساڵ، بەشداری وەزیری كشتوكاڵ و سەرچاوەكانی ئاوی هەرێمی كوردستان، لە كۆبوونەوەی لیژنەی باڵای نیشتمانی ئاوی عیراق، كە بە سەرۆكایەتیی سەرۆك وەزیرانی عیراق بەڕێوەچوو، ئەو بابەتانە لە بەرنامەی كاری ئەو لیژنەیە جێگیر كران و لە پلانی بودجەی فیدراڵی دانراوە.
 بۆ دروستكردنی بەنداوەكان رەچاوی شوێنی جوگرافی و هاوسەنگی لە دابەشكردن و دروستكردنی بەنداوەكان بۆ تەواوی ناوچەكانی هەرێم دەكەین.