ئۆرسولا ڤۆن دێرلاین، سەرۆکی کۆمیسیۆنی یەکێتیی ئەوروپا ئاشکرایکرد، یەکێتییەکەیان پلانێکی بەهێزی داناوە، تاوەکو وەڵامی هەر باجێکی نوێی ئەمریکا بداتەوە.
ئەمڕۆ سەرۆکی کۆمیسیۆنی یەکێتیی ئەوروپا لەبەردەم پەرلەمانی ئەوروپا رایگەیاند، ئەوان دەرگایان بۆ دانوستانەکان کراوەیە، بەڵام لە هەمان کاتدا لە ئەگەری سەپاندنی باجە نوێیەکانی سەرۆکی ئەمریکا پلانێکی بەهێزیان هەیە.
چاوەڕوان دەکرێت رۆژی چوارشەممە، لە یادی رۆژی ئازادیی ئەمریکادا، دۆناڵد ترەمپ، سەرۆکی وڵاتەکە باجی نوێ بەرامبەر ژمارەیەک وڵات ئاشکرا بکات، تاوەکو بەگوتەی خۆی نادادپەروەریی بازرگانیی کەمبکاتەوە.
لەبەرامبەر هەنگاوی داهاتووی وڵاتانی ئەوروپا، سەرۆکی کۆمیسیۆنی یەکێتییەکە دەڵێت، راگەیاندنەکە هەڵدەسەنگێنن، تاوەکو بە وریاییەوە وەڵامێکی گونجاویان هەبێت و هەنگاوی داهاتویان بزانن.
ئەو بەرپرسەی یەکێتیی ئەوروپا راشیگەیاند، ئەوروپا ئەم رووبەڕووبوونەوەیەی دەستپێنەکردووە، ئامانجی ئەوانیش دۆزینەوەی چارەسەرێکە، بەڵام لە کۆتاییدا بەرژەوەندی و خەڵک و کۆمپانیاکانیشیان دەپارێزن.
