د.یادگار عەلی
دوای [٢٥] کاتژمێر و چوار خولەک، سیناتۆری دیموکرات، کۆری بووکەر درێژترین وتاری لە مێژووی ئەنجومەنی پیرانی ئەمریکادا پێشکەش کرد، ئەو پێوانەیەی شکاند کە لەلایەن سیناتۆری کۆچکردوو، سترۆم تۆرمۆندەوە تۆمار کرابوو، کە لە ساڵی [١٩٥٧]دا [٢٤] کاتژمێر و [١٨] خولەکی خایاند و سەرنجی سیاسیی یان ناڕەزایەتیی دەربڕین بوو بەرامبەر بە کارێکی حکومەت.
بووکەر ئەم وتارە درێژەی پێشکەش کرد، وەک ناڕەزایەتییەک بەرامبەر بە سیاسەتەکانی ئیدارەی سەرۆک دۆناڵد ترەمپ، بەتایبەتی سەبارەت بە پرسەکانی، وەک:
• کەمکردنەوەی بەرنامەکانی چاودێری تەندروستی، وەک مێدیکەید.
• دووبارە داڕشتنەوەی حکومەتی فیدراڵی بە سەرۆکایەتی ئیلۆن ماسک.
• هەڕەشە بۆ سەر چینی ناوەڕاست و هەژاران لە ئەمەریکا.
لەڕێگەی وتارەکەیەوە، بووکەر ویستویەتی سەرنجی خەڵک ڕابکێشێت بەوەی، کە ئەوەی روودەدات [قەیرانی نیشتمانی]یە.
بۆچی ئەندامانی کۆنگرێس هەنگاوێکی لەو شێوەیە بەکاردەهێنن؟
ئەم هەنگاوە هەندێکجار بە [فیلبەستیر] ناسراوە، شێوازێکی ناڕەزایەتی یاساییە، کە ئەندامانی کۆنگرێس بە تایبەت لە ئەنجومەنی پیران بەکاریدەهێنن، کاتێک هێزی ژمارەییان نییە بۆ وەستاندنی بڕیارنامەیەک یان یاسایەک. ئەوان مافی قسەکردنیان بۆ ماوەیەکی نادیار بەکاردەهێنن بۆ تێکدانی کارنامەی ئەنجومەن بۆ ماوەیەکی کاتی یان بۆ ڕاکێشانی سەرنجی میدیا و ڕایگشتی.
لە دۆسێی بووکەردا ڕێگری لە یاسایەکی دیاریکراو نەدەکرد، بەڵکو دەیویست تیشکبخاتە سەر گەورەیی ئەو قەیرانەی کە لە ئەنجامی سیاسەتەکانی ترەمپدا بینیویەتی و نیشان بدات، کەسانێک هەن، کە بە توندی دژی وەستاونەتەوە.
