لە راگەیاندراوێکدا بەرگری شارستانی سلێمانی سەبارەت بە ئاگرەکەی بازاڕی مەزاد خانەی سەرەوە(دارە سووتاوەکە) رایگەیاند، سەرلەبەیانی ئەمڕۆ ئاگر لە بەشێکی بازاڕی دارەسووتاوەکەی سلێمانی کەوتەوە و دەیان دوکان سوتان. بەڕێوەبەرایەتی بەرگری شارستانی سلێمانیش لە راگەیەندراوەکەدا بڵاویکردەوە کە تیمەکانیان توانیویانە ئاگرێکی گەورە لە بازاڕی مەزادخانەی سەرەوە (دارەسووتاوەکە) کۆنتڕۆڵ بکە.
بەپێی ڕاگەیەندراوەکەی بەرگری شارستانی سلێمانی، دوای ئاگارکردنەوەیان لە بونی روداوی ئاگرەکە، دەستبەجێ تیمەکانیان گەیشتوونەتە شوێنی روداوەکە.
راشیگەیاندووە، سەرەڕای سەختی و دژواری گەیشتن بە شوێنی روداوەکە کە ئۆتۆمبێلەکانی ئاگرکوژێنەوەی زۆر ئەستەم کردبو، بە لێهاتوویی و خێراییەکی بەرچاوەوە روبەروی دۆخەکە بوونەتەوە.
هەر لە راگەیەندراوەکەدا هاتووە، سەرەڕای گەورەیی ئاگرەکە و بوونی بڕێکی زۆر لە کەلوپەلی جۆراوجۆر و ئاسان بۆ سووتان کە هۆکار بوون بۆ خێرا تەشەنەکردنی، بەڵام تیمە کارامە و دڵسۆزەکانی بەرگری شارستانی توانیان بە دانانی پلانێکی تۆکمە و دابەشبوونیان بەسەر شەش قۆڵدا، ئاگرەکە کۆنتڕۆڵ بکەن و رێگری لە تەشەنەکردنی زیاتری بکەن بۆ دوکان و موڵکی دەوروبەری ناو بازاڕەکە.
بەڕێوەبەرایەتی بەرگری شارستانی سلێمانی جەختی کردۆتەوە کە خۆشبەختانە ئەم ڕووداوە هیچ زیانێکی گیانی لێنەکەوتۆتەوە.
