سەندیکای مامۆستایانی عیراق، لە راگەیاندراوێکدا، داواکارییەکی نۆ خاڵی ئاڕاستەی ئەنجومەنی وەزیرانی عیراق کردووە، هەڕەشەی بایکۆتی سەرتاسەریی پرۆسەی خوێندن دەکات، ئەنجومەنی وەزیرانیش هەڵسەنگاندن بۆ داواکارییەکانیان دەکات.
داواکارییە نۆ خاڵییەکەی سەندیکای مامۆستایانی عیراق، گرنگترینیان دروستکردنی یەکەی نیشتەجێبوونە لە تەواوی پارێزگاکان بۆ مامۆستایان و زیادکردنی دەرماڵەی پیشەیی و هاتوچۆ بە رێژەی %50 و دەرماڵەی شوێنی جوگرافی و جێگیرکردنی گرێبەستەکانی ساڵی 2020 و خەرجکردنی مووچەی مامۆستایانی گرێبەستە بۆ ساڵی 2024.
سەبارەت بە جێبەجێکردنی داواکارییەکانیان، عودەی عیساوی، نەقیبی سەندیکای مامۆستایانی عیراق، لەگەڵ وەزیرى پەروەردە و ئەمینداری ئەنجوومەنی وەزیراندا کۆبووەوە و بەفەرمیی داواکارییەکەی پێشکەشکردن.
سەندیکای مامۆستایان لە راگەیەندراوەکەیدا دەڵێت، داواکارییەکانیان لە دانیشتنی داهاتووی ئەنجوومەنی وەزیراندا گفتوگۆی لەسەر دەکرێت، بە ئامادەبوونی نەقیبی سەندیکاکە.
هەر لە راگەیەندراوەکەدا هاتووە، رۆژی یەکشەممە، سەرۆکوەزیرانی عیراق لەگەڵ تەواوی پارێزگارەکاندا کۆدەبێتەوە، لەپێناو جێبەجێکردنی داواکاریی مامۆستایان، تایبەت بە دروستکردنی گەڕەکی نیشتەجێبوون بۆیان".
هاوکات نامس جبوری، وەزیرى پەروەردەی عیراق رایگەیاندووە، "داواکارییەکانی سەندیکای مامۆستایان رۆژی سێشەممەی داهاتوو لە دانیشتنی ئەنجوومەنی وەزیران و بە ئامادەبوونی نەقیبی سەندیکای مامۆستایان گفتوگۆیان لەسەر دەکرێت.
ئەم راگەیەندراوەی سەندیکای مامۆستایانی عیراق لەکاتێکدایە، بڕیارە سبەی یەکشەممە، مامۆستایان لەسەرجەم پارێزگاکانی عیراق بایکۆتی سەرەتاسەری بکەن، لەپێناو جێبەجێکردنی داواکارییەکان.
