ئەنجومەنی وەزیرانی عیراق لە دانیشتنێکی نائاساییدا بە سەرۆکایەتی محەممەد شیاع سوودانی رایگەیاندووە، چوار هەنگاوی گرنگ دژ بە سیاسەتی تاریفەی گومرگیی ترەمپ دەگرنەبەر.
لە راگەیاندراوەکەدا هاتووە، ئەنجومەنی وەزیران چوار ڕێکاری دەرکردووە کە جەخت لە پەرەپێدانی پەیوەندییە بازرگانییەکان و قووڵکردنەوەی هاوکارییە ئابوورییەکان دەکات لەگەڵ ویلایەتە یەکگرتووەکانی ئەمەریکا.
لە رێکاری یەکەمدا، عیراق پلانی داناوە بۆ پێشخستن و پەرەپێدانی پەیوەندییە بازرگانییە هاوبەشەکان، لە میانی کردنەوەی دەروازە و دەرچە بۆ دابەشکەر و دەزگا بازرگانییە ئەمەریکاییەکان، چالاککردنی دەزگا بازرگانییە عیراقییەکان، و مامەڵەی بازرگانیی راستەوخۆ لە نێوان سێکتەرە هاوشێوەکانی نێوان عیراق و ئەمەریکا.
سەبارەت بە رێکاری دووەم، حکومەتی عیراق جەختی کردووەتەوە لەسەر پەرەپێدانی خزمەتگوزاریی بانکی لە نێوان کەرتی بانکی و دارایی لە عیراق و ئەمەریکا، بە شێوەیەک کە بەدیهێنانی بەرژەوەندیی ئابووریی هاوبەش مسۆگەر بکات.
رێکاری سێیەم بریتییە لە پێکهێنانی تیمێکی دانوستانکار لەگەڵ لایەنی ئەمەریکی بۆ پێداچوونەوە بە بنەماکانی پەیوەندیی بازرگانی لەگەڵ ئەمەریکا، بە ئامانجی باشترکردنی، و دڵنیابوون لە بونیاتنانی پەیوەندیی هاوسەنگی ئابووری و بازرگانیی کە گەرەنتی بەرژەوەندی هاوبەشی نێوان هەردوولا بکات.
لە ڕێکاری چوارەمدا، داوا لە وەزارەتەکانی دەرەوە، دارایی و بازرگانی کراوە لەگەڵ لایەنە پەیوەندیدارەکانی دیکە، گفتوگۆیەک لەگەڵ هاوتا ئەمەریکاییەکان بکەن بۆ دڵنیابوون لە بەهێزی پەیوەندییە بازرگانییەکان و چاودێریکردنی بازاڕە داراییەکان.
رۆژی پێنجشەممە، دۆناڵد ترەمپ، سەرۆکی ئەمەریکا بڕیاری سەپاندنی باجی گومرگی بەسەر 180 وڵات ئیمزا کرد.
