ڤیان محەمەدتاھر
برین یێن بووینە گوپالەكێ حەیزەرانی و ناخێ مە یێ د دەستێ خوە گرتی، دا ژ كەلەخێ مە نەكەڤیت.. برینێن هەر ئەندامەكێ لاشێ مە، یێن دگەل ئێك كەفتینە ڤڕا، دەرمانێ وان بۆ مە یێ بوویە برینەكا كوورتر. هێمایێ عەشق و كەرب و شاهيیێ و شەر و ئاشتیيێ هەر برینن. بۆ كینیا كچا و زاڤانیا كوران و پیراتی و گەنجاتی و سنێلە و زارۆكینیێ ژی، برینەكا ڤەشارتیيا هەلگرتینە..
نڤێسین و خواندن و هەلبەست و رۆمان و تێكست و هایكویێن مە تەڤا، ئەو یا دناڤدا دیارە. هەروەكی بارانەك ژ برینان یا ب سەر ڤی وەلاتی دا باری و دەمارێن سروشتی ژی یا ڤەخواری، هند یا ڤەخواری هەتا پێ حەمەر بووی و ئێدی دناڤ خوارنان ژیدا، تاما برینایە.. كەش و هەوا و داروبار هەمی پێ د سەلخینە. چەند پشكوژا گولەكێ ڤەدبیت. برینەكا ل سەر كەشە، هەر بەلگەكی یا خوە ب برینەكێڤە گرتی.. چەند زارۆكەك دگریت، برینەك دگەل دكەنیت.. چەند ڕۆژەك ئاڤادبیت، برینەك ل شوینێ دهەلێت. هندی خەونەك دهێتە دی، هیڤیەك، خوەزیەك بریندار دبیت.. چەند رەشبینیەك، یاخیبوونەك، بێ ئومیدیەك مە دگریت، گەشبینیەك د برینەكێدا پەیدا دبیت..
وەسا خویایە، ئەم ل سەر ئاخەكا ژ برینا پەنگی بووینە و دناڤدا مەزن دبین، ب ئێكێ دێ پێ مرین، ب هەر داڤەكا پرچا مەڤە برینەكێ یا خوە پێڤەگرتی.. هەر سترانەكا د سترینین، برینەك پەیڤێن وێیە.. هەر راستیەكا ژ درەوێ رزگار دبیت، ب برینەكێ یا نخافتیە، هوین دزانن برین ل ڤی وەلاتی و ل سەر ڤێ ئەردی چیە؟ هوین دزانن رامانا برینداریێ دناڤ گوشت و خوینێن خەلكێ ڤی خاكیدا چیە؟!
ئەو ئازادییە!
ئەوا ب قەد پیتێن خوە بوویە برین و ب خوینا وان، ڤێ ئاخێ خوە پێ شویشتی و ئەم ب هەمی خێرانێن وێ بریندار بووین، نە دەنگێ وێ دبینین، نە رەنگێ وێ بتنێ هەست ب هەبوونا ئێشانا وێ یا بەری حەفت سەد هزار سالا دكەین. ئەم د برینەكێدا رادبینەڤە و دگەل برینەكا دی دكەڤین..
