لە یادی حەوت ساڵەی كۆچی دوایی شێخ بایز تاڵەبانیدا

لاپەڕەی سەروەران

تێكۆشەری نەمر، بایز سەعید محەمەد عەبدولغەنی ناسراو بە شێخ بایز تاڵەبانی، ساڵی 1944 لە گوندی (باداوا)ی سەر  بە ناحیەی لەیلانی پارێزگای كەركوك لەدایك بووە و هەر لەوێ خراوەتە بەر خوێندن، ساڵی 1956 لە كەركوك درێژەی بەخوێندن داوە و  قۆناغی دواناوەندیی لەوێ تەواو كردووە.
ساڵی 1958 كاتێك كە خوێندكاری ناوەندیی موسەڵڵابووە لە كەركوك، چۆتە ریزی یەكێتیی قوتابیانی كوردستانەوە و لە ساڵی 1965دا پەیوەندیی بە پارتی دیموكراتی كوردستانەوە كردووە.
ساڵی 1968 بە كارمەند لە شارەوانیی كەركوك دامەزراوە و ساڵی 1970 گواستراوتەوە بۆ بەڕێوەبەرایەتیی ئەشغالی هەولێر و هەر ئەو ساڵە بۆتە لێپرسراوی لقی كەركوكی یەكێتیی لاوانی دیموكراتی كوردستان، ساڵی 1972 گواستراوەتەوە بۆ بەڕێوەبەرایەتی ئەشغالی كەركوك.
ساڵی 1973 بۆتە لێپرسراوی لقی بەغدای یەكێتیی لاوانی دیموكراتی كوردستان و ئەندامی سكرتاریەت، هەر ئەوساڵە لەگەڵ هەریەك لە دارۆ شێخ نوری، عەبدولڕەزاق عەزیز میرزا و ئەنوەر قەرەداغی و جەمال حەكیم ئاغا، بەشداربووە لە فیستیڤاڵی جیهانیی لاوان لە ئەڵمانیای رۆژهەڵات.
ساڵی 1974 لە هەڵگیرسانەوەی شەڕی نێوان حكومەتی عیراق و شۆڕشی كورددا، بوو بە پێشمەرگە.
دوای هەرەسی شۆڕش لە 1975دا، گەڕایەوە بۆ كەركوك و دوور خرایەوە بۆ بەڕێوەبەرایەتیی رێگەوبانی رومادی لە پارێزگای ئەنبار، لە كۆتایی هەمان ساڵدا گواسرایەوە بۆ بەڕێوەبەرایەتیی ئەشغالی گشتی، ساڵی 1990 گواسترایەوە بۆ ناسریە.
ساڵی 1991 گەڕاوەتەوە بۆ كوردستان و پەیوەندیی بە یەكێتیی نیشتمانیی كوردستانەوە كردووە و ساڵی 1994 بۆتە ئەندام كۆمیتەی پێنجی فەرمانبەران.
ساڵی 1995 بۆتە ئەندامی مەكتەبی پەیوەندییەكانی دەرەوە، ساڵی 1996 بە هەمان پلە بۆ مەكتەبی دارایی گواستراوەتەوە و هەمان ساڵ بۆتە بەڕێوەبەری ژمێریاری لە بەڕێوەبەرایەتیی ئەشغالی سلێمانی.
لە ساڵی 1997 و دواترەوە، رۆڵی گرنگ و بنچینەیی بینی لە دامەزراندنی چەند دەزگایەكی داراییدا، لەو ساڵەدا دەزگای چاودێریی دارایی حكومەتی هەرێمی كوردستان-ئیدارەی سلێمانیی دامەزراند و تێیدا بە پلەی سەرۆكی دیوانی دەزگاكە، كاری كردووە.
ساڵی 2001 دەزگای چاودێریی دارایی بۆ یەكێتی دامەزراندووە و دواتر هەر خۆشی لێپرسراوێتی گرتۆتە ئەستۆ.
ساڵی 2002 بۆتە وەزیری دارایی و ئابووری لە ئیدارەی سلێمانیی حكومەتی هەرێمی كوردستان، هەروەها لە كابینەكانی پێنجەم و شەشەم و حەوتەمی حكومەتی هەرێمی كوردستاندا وەزیری دارایی بووە.
ساڵی 2014 بە پلەی وەزیر خانەنشین كراوە.
بەداخەوە، رۆژی 21/6/2018 كۆچی دوایی كرد.