رۆژی شەهیدی یەکێتی، رۆژی کەم ژیان و کەڵ ژیان
تۆماری خەباتی چل و حەوت ساڵەی یەکێتی و شۆڕشی نوێی گەلەکەمان، لە یەکەم شەهیدەوە تا دواشەهید تۆمارێکی پڕ لە شانازی بێ بڕانەوەی یەکێتییە کە نەخشەی سەرتاسەری نیشتمانی گرتۆتەوە.
کەسوکار و خانەوادەی سەربەرزی شەهیدان
لەم رۆژەدا بۆ یادی ئەو هاوخەبات و هاوسەنگەرانەمان کە لە زیندانەکانی رژێمی بەعسی سەدامیدا بە سەربەرزی و بەدەم دروشم و سروودەوە چوونە بەر پەتی سێدارە، یان لە سەنگەرەکانی بەرگریدا بەوپەڕی جوامێرییەوە سنگیان دایە بەر گوللەی دوژمن و گیانیان بەخشی بە وڵات و گەلەکەیان، سەری سوپاسگوزاری و ڕێزگرتن دادەنوێنین.
لە مێژووی پڕ لە خەباتی یەکێتیی نیشتمانیی کوردستاندا هەموو رۆژەکانی ئەم تۆمارە سەربەرزە پڕیەتی لە بیرەوەری شەهید، لە بەخشین و گیانبازیی رۆڵە و کەسو کار و هاوخەبات و هاوسەنگەرانمان،بەڵام کە رۆژێکی وەک 21 ی تشرینی دووەممان دیاری کردووە بە ترۆپکی شەهادەت یادی لە سێدارەدانی خاڵە شیهاب و هاوڕێکانێتی، ئەوان لە سەرەتای دامەزراندنەوە وەک پۆلێکی سەرمەشق گیانیان بەخت کرد و دروشمی( کەم بژی و کەڵ بژی) یان داهێنا، ئیتر لەو رۆژەوە لە سەنگەری بەرگری لە ناوچە رزگارکراوەکان، لە داستان و نەبەردییەکان، لە زیندانەکان، لە چالاکی و خۆپیشاندانەکانی ناوشارەکان لە راپەڕین و پڕۆسەی ئازادی عیراق و لە رووبەڕووبوونەوەی تیرۆریستان، سەدان وهەزاران رۆڵەی ئەم گەلە چوونەتە نێو کەژاوەی شەهادەتەوە و لەم دەفتەری پڕ لە شانازییەدا هەموو چین و توێژەکانی کوردەواری دێڕ و دەربڕین و گوزارشتی گیانبازییان هەیە.
کەسو کاری سەربەرزی شەهیدان
ئەم یادە پڕ لە شکۆیە دەرفەتێکە بۆ جۆشدانەوەی خەباتی رەوای گەلەکەمان و یەکێتییەکەمان، لەپێناوی ماف و دادپەروەری و دیموکراسی و راستکردنەوەی رێڕەوی حوکمڕانی لە کوردستان و نەهێشتنی سیاسەتی جیاوازیکردن لە خزمەت بە ناوچەکانی کوردستان و راگرتنی تاکڕەوی و خۆسەپێنی بەسەر ئیرادەی خەڵکدا، بۆ ئەوانە یەکێتیی نیشتمانیی کوردستان ئەو خەباتەی شەهیدەکانمان جۆشدەداتەوە کە لە پێناویاندا گیانی خۆیان بەخشی .
هەر لەم یادەدا لە پای سەنگی یەکێتی بە شانازیکردن، بە شەهیدەکانییەوە، بۆ هەمیشە بەڵێنی بەردەوامیدان بەو کاروانە پڕ لە قوربانیدانە دووپات دەکەینەوە.
بە سەنگی شەهیدانمان سەربەرزین و هەر بەو سەنگەشەوە پێداگری لەسەر سیاسەتی راست و رەوامان دەکەین.
مەکتەبی سیاسی
یەکێتیی نیشتمانیی کوردستان
